A Deputación de Pontevedra aproba "as contas máis ambiciosas da historia" e o PP di que "non son realistas"

A Deputación de Pontevedra aprobou este venres nun pleno extraordinario o orzamento de 2023, que aumenta nun 6,55% con respecto a 2022 e que supón pór a disposición da provincia un total de 187,35 millóns de euros ao sumar aos 181,63 millóns do orzamento os 5,72 millóns de remanentes deste ano.

Na defensa das contas provinciais, o deputado socialista Carlos López Font sinalou que este é "o orzamento máis ambicioso de toda a historia da institución" e que ten o obxectivo de acometer unha "potente inxección económica" no territorio para enfrontar a crise.

En liñas xerais, segundo explicou o deputado socialista, o Plan Concellos aumenta ata os 44 millóns de euros en transferencias directas, ademais doutras accións, que suman 24,85 millóns, que revalidan á deputación como "a institución provincial que máis recursos transfire aos concellos".

Pola súa banda, o vicepresidente da Deputación e portavoz do BNG, César Mosquera, insistiu en que estas contas son "ambiciosas, expansivas e prudentes".

O portavoz do grupo provincial do Partido Popular, Jorge Cubela, criticou que os orzamentos "non están á altura" xa que "non son realistas" e "deixan orfos os concellos e os veciños".

Cubela lamentou que non se destine aos concellos o incremento do orzamento, que sumando os remanentes supoñen que a deputación contará con 11 millóns de euros máis en 2023, "pero para o Plan Concellos só destinan unha pedrea dun millón de euros e as transferencias aos concellos baixan case un 5%" a pesar, engadiu, de todas as demandas "dos alcaldes de todas as cores políticas".

"Reclamamos uns orzamentos municipalistas e estes non o son", destacou o PP para xustificar a emenda á totalidade do proxecto de orzamentos presentado polo Goberno provincial. "É unha emenda de devolución, non de substitución", replicou Cubela.

"Non queremos cambiar nada porque cando gobernemos faremos os nosos propios orzamentos", aseverou o popular, quen, respecto ao capítulo dedicado ao persoal, sinalou que PSOE e BNG van finalizar oito anos de goberno tendo amortizadas prazas de xefaturas de servizo para crear postos directivos.

"É dicir, políticos a dedo facendo funcións de funcionarios, impedindo a carreira profesional e colocando a comisarios políticos para o control de todo", apostilou.

"DEMAGOXIA" DO PP

Carlos López Font reprochou a "demagoxia" do Partido Popular e comparou os 44 millóns do Plan Concellos cos 4,7 millóns que dedica a Deputación de Ourense ou coa "conxelación do Fondo Local da Xunta".

"Deberíaselles pór a cara colorada, pero é verdade que o cemento e o formigón armado non cambia de cor", afirmou Font. "Non teñen argumentos, son absolutamente triviais e pon cara seria como se llo cresen", engadiu.

Na súa réplica, Cubela apuntou que "están moi nerviosos". "O tsunami político que vén en España está ás portas e seguro que o Partido Popular vai recuperar moitas alcaldías na provincia de Pontevedra", concluíu o portavoz do PP.

Finalmente, con 16 votos a favor e 11 en contra quedou aprobado inicialmente este orzamento para 2023.