Galicia lidera a vacinación coa cuarta dose de reforzo a pacientes a partir de 70 anos
O Sergas duplica a media estatal a maiores de 80 e triplícaa na franxa 70-79, pero non chega á metade na de 60-69.
Por Europa Press / Redacción | SANTIAGO DE COMPOSTELA | 21/10/2022 | Actualizada ás 20:02
Galicia contabiliza un total de 262.204 persoas maiores de 70 anos coa cuarta dose da vacina contra a covid-19. Isto implica unha taxa de cobertura do 68,61% da poboación de máis de 80 e do 34,29% na franxa entre os 70 e os 79 anos, ambas as cifras á cabeza das autonomías.
Así o recolle o informe cos datos de vacinación ofrecido este venres polo Ministerio de Sanidade --actualizados ata o mércores--, que indica que hai 162.067 pacientes maiores de 80 anos con este segundo reforzo posto. A cobertura do 68,61% entre a poboación de máis idade implica case duplicar a media estatal, situada no 34,75%. Tras a galega, a segunda autonomía é Asturias, co 62,3%, e a terceira Estremadura, xa co 49,55% dos maiores de 80 coa cuarta dose.
A posición avantaxada de Galicia tamén se observa na administración do segundo reforzo á franxa de 70 a 79 anos, cunha cobertura do 34,29% (100.137 persoas inoculadas) case unha semana despois do arranque da vacinación deste grupo etario. Esta porcentaxe supón máis que triplicar a taxa estatal, situada no 11,26%. A segunda comunidade é Navarra, co 27,21%, e a terceira Euskadi, co 26,42% de cobertura entre os 70 e os 79 anos.
Con todo, esta posición avantaxada xa non é así no caso de pacientes de 60 a 69 anos, que aínda empezan a ser citados de forma masiva polo Sergas. En Galicia, son 5.479 persoas desta idade coa cuarta vacina, só o 1,55%, fronte ao 3,73% da media de toda España.
