Un adulto e dous menores resultan feridos nunha colisión múltiple en Barbadás
Por E.P. | SANTIAGO DE COMPOSTELA | 23/10/2022 | Actualizada ás 11:12
Un adulto e dous menores resultaron feridos nunha colisión múltiple na que se viron implicados tres vehículos na autovía A-52, ao seu paso polo municipio ourensán de Barbadás.
Segundo trasladou o 112 Galicia, o sinistro produciuse ás 21,45 horas deste sábado no quilómetro 226 da A-52, en sentido Vigo. Un particular alertaba do accidente e informaba de que había múltiples restos materiais esparexidos polo asfalto.
Con estes datos, a central de emerxencias deu aviso aos servizos sanitarios, aos Bombeiros de San Cibrao das Viñas, á Garda Civil de Tráfico, ao GES do Pereiro de Aguiar, a Protección Civil de Barbadás e ao servizo de mantemento de estradas.
Finalmente, o persoal de Urxencias Sanitarias de Galicia-061 confirmou ao 112 Galicia que trasladara a tres persoas ao centro hospitalario de referencia a bordo dunha ambulancia, aínda que os servizos de emerxencias informaban de que o seu estado non revestía gravidade.
Pola súa banda, os Bombeiros de San Cibrao das Viñas tiveron que intervir neste incidente para limpar os restos da colisión e restablecer as condicións da vía.
SAÍDA DE VÍA EN SANTIAGO
Por outra banda, en Santiago de Compostela unha persoa tivo que ser trasladada en ambulancia tras chocar o seu coche contra un poste de iluminación na estrada DP-0701, en Santa María da Peregrina.
Sobre as 20,15 horas deste sábado, un particular que se atopaba na zona deu aviso ao 112. No operativo, ademais dos servizos sanitarios, participaron axentes da Garda Civil de Tráfico e voluntarios de Protección Civil de Santiago.
