A Praza do Obradoiro, elixida como unha das de maior encanto de Europa
É o resultado dunha enquisa desenvolvida por Jetcost, buscador de voos e hoteis que periodicamente pregunta sobre os espazos máis exclusivos de Europa.
Por Galicia Confidencial | SANTIAGO DE COMPOSTELA | 26/10/2022 | Actualizada ás 20:00
Non sempre son as máis grandes, nin as máis antigas, nin as máis famosas, pero si que son as que teñen un maior encanto. Ou, polo menos, así o cren as persoas usuarias de Jetcost, un buscador de voos e hoteis que periodicamente pregunta sobre os espazos máis exclusivos de Europa.
Nesta ocasión, a clientela foi preguntada sobre as prazas que consideran con máis encanto e nas que poder gozar dun bo momento mentres se contempla a contorna e se vive o seu ambiente. A Praza do Obradoiro, entre outras 14, foi unha das escollidas pola historia que alberga e pola presenza de distintos estilos arquitectónicos.
Canda a ela, tamén aparecen no ránking a Praza de España en Sevilla; a Praza Maior en Madrid; a Praza Maior en Salamanca; a Praza Navona en Roma; a Praça do Comércio en Lisboa; Trafalgar Square en Londres; Praza da Cidade Vella en Praga; Plaza Pretoria en Palermo; Praza da Santísima Trinidade en Budapest; a Grand-Place en Bruselas; a Place de la Bourse en Burdeos; Piazza del Campo en Siena; e Marienplatz, Múnich.
