Críticas da oposición ás rebaixas fiscais no primeiro debate dos orzamentos de 2023 na Cámara

O conselleiro de Facenda e Administración Pública, Miguel Corgos, estreou este mércores o calendario de debates parlamentarios para a tramitación dos orzamentos da Xunta para 2023, nos que os dous grupos da oposición coincidiron en criticar as rebaixas de impostos expostas.

Así, mentres que o BNG tachou as contas para o próximo exercicio de "insolidarias" e "ineficaces" para paliar a crise de prezos, o PSdeG aproveitou para lembrar a dimisión da xa ex primeira ministra do Reino Unido Liz Truss polas súas polémicas políticas fiscais.

O titular de Facenda comezou a súa intervención cunha explicación da actual "situación xeopolítica", principalmente pola guerra en Ucraína, que provocou unha crise inflacionista e unha diminución das expectativas de crecemento unha vez superada a crise sanitaria da covid-19.

Neste contexto, Corgos garantiu que a Xunta "vai estar á altura para protexer ás familias" ante a esta situación cunhas contas de 16.620 millóns de euros para o próximo ano --21 millóns máis sobre o teito de gasto aprobado no verán--, que son 993 millóns máis que os que están en vigor neste 2022.

En definitiva, o conselleiro insistiu en que o proxecto de orzamentos inclúe "medidas de impulso que precisa" Galicia, cun reforzo adicional de máis de 500 millóns de euros en cinco liñas que van á vez do plan estratéxico autonómico con horizonte 2030: apoio e protección ás familias, aforro enerxético, dinamización económica, medio ambiente e loita contra a seca, e reforzo de servizos públicos.

Así mesmo, descartou que o crecemento do investimento para 2023 se deba a unha maior achega por parte do Goberno de España e da Unión Europea, como asegurou a deputada do PSdeG Begoña Rodríguez Rumbo, á vez que criticou a xestión dos fondos Next Generation por parte do Estado.

O conselleiro de Facenda e Administración Pública, Miguel Corgos, comparece na Comisión 3ª, de Economía, Facenda e Orzamentos.. XUNTA | Fonte: Europa Press