Por Galicia Confidencial | A Coruña | 26/10/2022 | Actualizada ás 14:56
O presidente da Federación Galega de Municipios e Provincias (Fegamp), o socialista Alberto Varela, diríxese ao presidente da Xunta, Alfonso Rueda, para que "pare" o proxecto de orzamentos autonómicos de 2023 e sente a "negociar" o financiamento dos concellos, singularmente as contías do fondo de cooperación local.
A través dun comunicado, Varela advirte que os recursos cos que contan as entidades locais non só son "insuficientes", senón que as achegas da Administración galega mantéñense "conxeladas desde hai unha década".
A Fegamp lamenta a reunión da semana pasada na que a Xunta lle presentou os orzamentos para 2023. Segundo este proxecto, o fondo de cooperación local mantén a partida base en 113 millóns de euros, tendo en conta que a adicional duplícase de 12,9 a case 30,5 millóns. En total, serán 143,5 millóns.
Neste contexto, o presidente da federación municipalista, que tamén é alcalde de Vilagarcía de Arousa, quéixase de que a Xunta pretende "enmascarar" o aumento do financiamento local a través do fondo adicional, que está "restrinxido" a concellos de menos de 15.000 habitantes "baixo condicións en prazos e forma ás veces imposibles de cumprir".
Así, Varela advirte que os municipios "non poden resistir máis a infrafinanciación" e que "as subidas de prezos e especiais dificultades do momento poden ser unha estocada fatal para moitos servizos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.