A Coruña prepara "desde hai semanas" un informe "moi completo" para ser a sede da Axencia de Intelixencia
Está previsto que nos próximos días o Consello da Xunta aprobe a proposta do Nodo Galego de Intelixencia Artificial que determina que é a cidade idónea para albergar este organismo.
Por Europa Press / Redacción | SANTIAGO DE COMPOSTELA | 27/10/2022 | Actualizada ás 16:01
A alcaldesa da Coruña, Inés Rey, confirmou que o Concello está a preparar "desde hai bastante tempo, desde hai semanas" un informe "moi completo" para avalar a candidatura da cidade herculina como sede da Axencia Estatal de Intelixencia Artificial (Aesia).
O documento valorará "todas as cuestións de carácter técnico, social, económico e de impacto que terá a futura axencia". Así o manifestou a rexedora, a preguntas dos xornalistas formuladas este xoves, sobre o contido do devandito informe.
Respecto ao ofrecemento por parte do Goberno municipal do edificio da Terraza, no centro da cidade, para a futura sede, explicou que a localización da Aesia nun edificio "emblemático" é unha das cuestións que se valoran "positivamente" nesta candidatura.
Está previsto que nos próximos días o Consello da Xunta aprobe a proposta do Nodo Galego de Intelixencia Artificial (Nodo GALICIA) que determina que A Coruña é a cidade idónea para albergar este organismo.
