Por E.P. | SANTIAGO DE COMPOSTELA | 28/10/2022 | Actualizada ás 14:58
A conselleira de Infraestruturas e Mobilidade, Ethel Vázquez, ratificou que "nestes momentos está activada a alerta por risco de inundacións na zona de Pontedeume" e indicou que no contexto actual, en que se pasa directamente da seca ás inundacións, "Augas de Galicia ten activados tanto os plans de seca como os de inundacións".
Así mesmo, a Dirección Xeral de Emerxencias e Interior activou o Plan Especial ante o risco de inundación en Galicia (Inungal) ante o risco de inundación. A Xunta prevé un posible desbordamento, ao superarse os limiares establecidos, nos ríos Tambre, en Val do Dubra; do Verdugo, en Ponte Caldelas; e do Deva, nas Regadas, en Arbo.
Vázquez explicou que estes plans foron aprobados pola Xunta de Galicia co obxectivo de "afrontar estes episodios cíclicos e que recorrentes, que forman parte xa case da normalidade climática de Galicia". Ademais, engadiu que "neste contexto teñen que colaborar tanto cidadanía, administracións locais e Xunta".
Nesta liña, Vázquez insistiu que os Orzamentos da Xunta para 2023 "están deseñados tendo en conta este contexto de cambio climático". Ademais, anunciou que neles "se contempla unha partida para a prevención de inundacións de 12 millóns euros".
Así mesmo, a titular de Infraestuturas explicou que na partida orzamentaria para o próximo ano tamén se consideran "un total 24 millóns de euros para o abastecemento de auga e para paliar a seca".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.