O acalde de Santiago sobre a candidatura a sede de Intelixencia Artificial: "Prevalecerá o sentido común"
Sánchez Bugallo volveu a mostrar o seu desacordo co proceso de elección da candidatura galega, que aposta pola Coruña e non considera que o chamamento á unidade que fixo este xoves o presidente da Xunta, Alfonso Rueda, teña un gran impacto.
Por E.P. | SANTIAGO DE COMPOSTELA | 29/10/2022 | Actualizada ás 14:08
O alcalde de Santiago, Xosé Sánchez Bugallo, asegurou que "o sentido común e de país" será o que prevaleza en canto á decisión de continuar ou retirar a candidatura da capital galega para acoller a sede da Axencia Estatal de Supervisión da Intelixencia Artificial (Aesia).
En declaracións aos medios este sábado, antes de participar nas xornadas da Muller Rural organizadas pola Federación de Asociacións de Mulleres Rurais de Galicia (Fademur) xunto ao presidente da Deputación da Coruña, Valentín González Formoso, o rexedor sinalou que "agora só hai dúas opcións: retirarnos ou seguir adiante".
Para tomar esa decisión, Bugallo reunirase este próximo luns con grupos municipais e axentes sociais. "Valorarémolo. Escoitarei a opinión da xente e tomaremos a decisión que nos pareza máis sensata e conveniente", sinalou.
O alcalde compostelán volveu a mostrar o seu desacordo co proceso de elección da candidatura galega, que aposta pola Coruña e non considera que o chamamento á unidade que fixo este xoves o presidente da Xunta, Alfonso Rueda, teña un gran impacto.
"A presidencia da Xunta perdeu a oportunidade de dar exemplo en todo isto. Así que esas apelacións agora teñen unha eficacia limitada", aseverou.
O xoves, tras a reunión semanal do Consello e en rolda de prensa, o líder do Executivo galego, aínda que evitaba pronunciarse expresamente sobre se as dúas urbes non seleccionadas (Santiago e Ourense) deben retirar as súas candidaturas en solitario, si advertiu que son "decisións políticas" e que "non é bo para que prospere" a postulación da Coruña, que é xa, segundo dixo, "a candidatura de Galicia".
