Os empregados da Xunta recibirán a suba salarial retroactiva do 1,5% "antes de finalizar o ano"
Agora, a Xunta remite o proxecto de lei ao Parlamento para que quede aprobado polo trámite de lectura única, é dicir, en dous plenos consecutivos.
Por Europa Press / Redacción | SANTIAGO DE COMPOSTELA | 03/11/2022 | Actualizada ás 14:13
O Consello da Xunta aprobou este xoves o proxecto de lei que subirá un 1,5% os salarios dos empregados públicos con efectos retroactivos, é dicir, desde o 1 de xaneiro de 2022. A intención, tal e como confirmou o presidente do Goberno galego, Alfonso Rueda, é abonar os incrementos "antes de finalizar o ano".
Trátase dun dos acordos retributivos alcanzados entre o Executivo estatal e os sindicatos CC.OO. e UGT, que impacta en todos os tipos de empregados públicos, tamén nos autonómicos. Agora, a Xunta remite o proxecto de lei ao Parlamento para que quede aprobado polo trámite de lectura única, é dicir, en dous plenos consecutivos.
Ademais, o Consello aprobou este xoves o novo desenvolvemento da carreira profesional da Administración Xeral da Comunidade Autónoma, que esta vez si incluirá aos traballadores temporais. Precisamente, senllas sentenzas xudiciais tombaran o acordo anterior porque non incluía a interinos nin eventuais.
Segundo explicou Alfonso Rueda en rolda de prensa, a carreira profesional serve para "impulsar a motivación" e a "formación continua dos empregados públicos" e traducirase en pluses anuais que van desde os 800 euros ata os máis de 2.500.
