Comesaña reivindica o aumento de recursos en Atención Primaria e acusa ao BNG de "manipular"
Afeou que o Bloque pide "desde hai anos" os "200 millóns" para o primeiro nivel asistencial. "Desde que empezou a pedilo, xa aumentamos máis de 300", criticou
Por Europa Press / Redacción | SANTIAGO DE COMPOSTELA | 05/11/2022 | Actualizada ás 18:39
O conselleiro de Sanidade, Julio García Comesaña, reivindicou este sábado o incremento de recursos impulsado desde a Xunta para a Atención Primaria, fronte ás críticas vertidas esta semana pola portavoz nacional do BNG, Ana Pontón.
En concreto, a portavoz nacional do BNG, Ana Pontón, avanzara que a súa formación reclamará un plan de choque para reforzar a Atención Primaria, no marco dos Orzamentos da Xunta para 2023, dotado con 200 millóns de euros para contratar máis persoal, e cunha partida específica de 21 millóns a maiores para saúde mental.
Nun audio difundido aos medios pola Consellería de Sanidade, o conselleiro acusou ao Bloque de "manipular" e "enganar", e lembrou un dato xa facilitado polo presidente galego, Alfonso Rueda, en sede parlamentaria: que se incrementan os recursos en 137 millóns para Atención Primaria, ata superar os 1.500, a maior contía "da historia" para este nivel asistencial.
Un paso máis, afeou que o Bloque pide "desde hai anos" os "200 millóns" para o primeiro nivel asistencial. "Desde que empezou a pedilo, xa aumentamos máis de 300", criticou, á vez que censurou o "lamentable uso" da sanidade que, baixo o seu punto de vista, fai o BNG, contribuíndo a "desprestixiala con fins políticos".
Finalmente, ironizou con que o Bloque, que "sustenta" en Pontevedra a unha presidenta de Deputación, a socialista Carmela Silva, que non deu contas na Cámara dos orzamentos provinciais, "non atendese" cando explicou no Pazo do Hórreo os recursos cos que traballará o departamento sanitario no ámbito autonómico.
