Ribera di que a plataforma experimental de eólica mariña é "fundamental" e "importantísima" para Galicia
O presidente da Xunta pide "flexibilización" na tramitación dos proxectos de enerxía eólica
Por Europa Press / Redacción | Santiago de Compostela | 09/11/2022 | Actualizada ás 10:07
A ministra para a Transición Ecolóxica e o Reto Demográfico e vicepresidenta terceira do Goberno, Teresa Ribera, confirmou este martes, tras a reunión mantida co presidente da Xunta, Alfonso Rueda, que considera "fundamental" para Galicia a plataforma experimental de enerxía eólica mariña e deu o seu apoio a este proxecto.
"Creo que é importantísimo que teña esa plataforma experimental", manifestou a ministra tras o encontro. Así, dixo que ten coñecemento de que nos primeiros movementos houbo "algunha controversia" con respecto ao emprazamento concreto, por se puidese xerar algún "perigo" con respecto á protección de aves, pero "é fundamental que Galicia teña esa plataforma".
"Galicia non se entende sen o mar, sen a potencia do seu mar e sen o aproveitamento adecuado off shore", manifestou Ribeira, quen observou que as características do sector fan "necesario" estudar os "desafíos" que poidan afrontar estes proxectos, o que inclúe a evacuación ou a estabilidade de plataformas flotantes e solucións para augas profundas como é o caso da costa galega a poucas millas da costa.
"E por iso, acelerar a plataforma de ensaio é fundamental", certificou a ministra, a quen o presidente da Xunta, Alfonso Rueda, pediu "máis flexibilidade na tramitación dos proxectos de enerxía eólica" previstos na Comunidade, especialmente os que teñen vinculación industrial.
"IR DA MAN"
Así, o mandatario autonómico, que estivo acompañado do seu vicepresidente económico, Francisco Conde, pediu "ir da man" na tramitación das autorizacións que permitan resolver un asunto "crave" para o futuro industrial de Galicia.
Alfonso Rueda sostén que Galicia "está en disposición de converterse nun referente nacional na eólica mariña", polo que pediu unha "implicación máis intensa" ao Goberno central. Neste sentido, a Xunta destaca, nun comunicado, que a vicepresidenta terceira do Goberno comprometeuse " a aprobar antes de que finalice este ano o plan que ordenará o desenvolvemento destes plans".
Ambos os dirixentes abordaron tamén a planificación da distribución eléctrica, algo "fundamental" para dar cobertura á industria galega, tanto á que está como á que quere asentarse. Ribeira comprometeuse, destaca o Executivo autonómico, a "estudar unha relación de necesidades prioritarias" de Galicia que lle trasladará o presidente e entre as q ue atópase a moi alta tensión qeu necesita a planta de Stellantis en Vigo.
