A Xunta acusa de "esaxeradas" as críticas contra o sistema de transporte escolar e insiste en problemas "puntuais"
A oposición denuncia atrasos, "autobuses que nin chegan", e mesmo problemas de seguridade -tres nenos en asentos para dous--, o que repercute, argumentan, non só na vida dos menores, senón tamén dos propios proxenitores.
Por E.P. | SANTIAGO DE COMPOSTELA | 09/11/2022 | Actualizada ás 17:15
O conselleiro de Cultura, Educación, FP e Universidades, Román Rodríguez, cualificou de "esaxeradas" as críticas, concretamente do PSdeG, ao sistema de transporte escolar de Galicia e insistiu en que os problemas rexistrados son situacións "puntuais".
Nunha interpelación no Pleno do Parlamento, os socialistas censuraron as "numerosas incidencias" no transporte escolar, comunicadas por concellos e comunidades educativas ante as Consellerías de Infraestruturas, Educación e ante a propia empresa, Monbus.
Denuncian atrasos, "autobuses que nin chegan", e ata problemas ata de seguridade -tres nenos en asentos para dous--, o que repercute, argumentan, non só na vida dos menores, senón tamén dos propios proxenitores.
Para ilustrar a situación, a socialista Noelia Otero leu ante os deputados algúns titulares de prensa que recollen a problemática, ante o que Román rebateu que os mesmos existían na época do bipartito.
O conselleiro, na súa intervención, tachou a intervención da deputada socialista de "esaxerada", argumentando que sempre se producen problemas no transporte escolar, sobre todo a principio de curso.
"O sistema de transporte escolar en Galicia é bo, tremendamente bo. Aínda que si, hai casos illados, sobre todo a principio de curso, que hai que ir corrixindo", explicou Rodríguez.
Incidiu en que a Xunta "cumpre a normativa" a este respecto e "todos os alumnos dentro da normativa, independentemente de onde vivan, teñen transporte". Así, presentou algúns datos como que, "co 5% da poboación, Galicia destina case un 20% do que dedica España á transporte escolar".
"Galicia conta coa rede de transporte escolar máis grande e importante de España", comentou o conselleiro, que lembrou ademais que se cobre a 80.000 alumnos, "o 40% dos que teñen dereito" e ao 70% dos centros educativos.
"En case 4.000 rutas pode haber casos concretos? Si. Sobre todo se temos en conta que este ano se modificaron case o 50% das rutas", apuntou Rodríguez, que insistiu en que se trata dun "servizo tremendamente complexo".
Sinalou ademais que se incoaron 24 expedientes de sanción a empresas responsables do transporte e recalcou que non se debe "xulgar o bosque por unha árbore". "Temos que estar orgullosos do noso sistema de transporte", defendeu.
