O Grupo Nogar defende que ten "todos os permisos" tras o incendio en Pontesa

A empresa Galigrain, pertencente ao Grupo Nogar, iniciou este venres unha investigación propia sobre o incendio da antiga fábrica de Pontesa declarado o domingo. Ademais, a pesar de que o Concello de Pontevedra ratificou que as instalacións onde se produciu o lume, tras o que morreu un traballador polas queimaduras causadas, non contaban con licenza municipal, a compañía defende que conta con "todos os permisos e protocolos" de seguridade.

Nun comunicado, a firma informou do inicio destes traballos internos, unha actividade que arrinca "tras dous días de loito como mostra do profundo respecto e afecto que unía ao equipo humano do Grupo Nogar" coa vítima, Benito González Dopazo, empregado de 59 anos e concelleiro do PSOE en Marín.

Galigrain precisou que o obxectivo da súa investigación é "esclarecer os motivos e circunstancias do sinistro causante desta terrible perda". Ademais, destacou que "a empresa colabora desde o primeiro momento coas autoridades" facilitando todos os datos, documentación e axuda requirida na investigación oficial para aclarar o sucedido.

A compañía aínda non puido analizar o estado das instalacións tras o incendio do domingo. A firma non poderá acceder ao interior para avaliar os danos ata ter garantías de que se fai en condicións de seguridade e contar co permiso das autoridades competentes.

Galigrain almacena nas antigas naves de Pontesa, nas que se atopa alugada desde 2018, aproximadamente 42.000 toneladas de fundamentalmente cebada e produtos de xirasol. A pesar de contar co permiso da Xunta para esta actividade, non tiña a licenza municipal, tal e como asegura o Concello de Pontevedra.

BENITO GONZÁLEZ

Á marxe desta investigación interna, desde a empresa indicaron que nestes momentos continúan enfocados "no apoio aos familiares e seres queridos de Benito González Dopazo", que era desde hai 30 anos "un dos principais responsables da operativa de Galigrain en Galicia como encargado da supervisión e coordinación do traballo de medio centenar de traballadores".

Pero, ademais desta faceta profesional, o comunicado engade que Benito era "ante todo, un amigo e membro da familia do GrupoNogar que será lembrado pola súa bondade, espírito e compromiso".

Fume na antiga fábrica de Pontesa, en Ponte Sampaio | Fonte: Beatriz Ciscar - Europa Press