Un biomarcador en sangue permite detectar o cancro colorrectal temperán
Trátase dunha investigación liderada polo IDIS.
Por E.P. | SANTIAGO DE COMPOSTELA | 11/11/2022 | Actualizada ás 14:00
Un novo biomarcador epixenético, que pode analizarse en mostras de sangue, permitiría diagnosticar o cancro colorrectal (CCR) nas súas etapas máis iniciais, segundo un estudo liderado por Ángel Díaz-Lagares e Rafael López da área de Cancro do CIBER (Ciberonc), do Instituto de Investigación Sanitaria de Santiago de Compostela (IDIS) e o Complexo Hospitalario Universitario de Santiago (CHUS).
A investigación, segundo sinalou o Idis nun comunicado, confirmou que a detección da metilación do xene LINC00473 a través de biopsia líquida podería ser útil para o cribado no invasivo do CCR en persoas que aínda non presentan síntomas.
O estudo, no que participaron 24 investigadores de 10 institucións nacionais e internacionais, tamén demostrou a súa utilidade para avaliar a eficacia do tratamento en pacientes con cancro colorrectal en fases avanzada.
Así, Díaz-Lagares explicou que as marcas epixenéticas como a metilación do ADN "controlan o funcionamento dos xenes actuando como interruptores" e que estas "poden estar alteradas nas etapas máis iniciais do cancro, converténdoas en biomarcadores ideais para a detección precoz da enfermidade".
O CCR é o terceiro tipo de cancro detectado con maior frecuencia e, segundo sinalada o estudo, espérase que os casos aumenten un 60% de aquí ao ano 2030. Ademais, este tipo de tumores diagnostícase habitualmente nunha etapa avanzada, polo que representa unha das principais causas de mortalidade por cancro.
