Persoal insuficiente e materiais "obsoletos" na cociña do Clínico de Santiago

A Federación de Sanidade de CC.OO. criticou o "menosprezo" da xerencia da área sanitaria de Santiago cara ao persoal de cociña do Complexo Hospitalario Universitario de Santiago de Compostela (CHUS), que ten unha dotación "insuficiente para asumir a carga de traballo" e uns medios materiais "obsoletos".

Segundo CC.OO., este colectivo profesional "xa tiña unha notable carga de traballo", dado que o persoal é "moi axustado" para un hospital como o CHUS, e viu incrementada o seu labor coa implantación de "novos dispositivos" ou a ampliación doutros, como o hospital de día ou a área de rehabilitación cardíaca.

A pesar disto, asegura o sindicato, a xerencia "negouse a dotar estes dispositivos de persoal de cociña propio, tendo que asumir a atención destas unidades o mesmo persoal que xa había". "Isto acabou provocando tamén denuncias das persoas usuarias, pois o traballo nestas condicións facilita as equivocacións", advirte o sindicato.

Á falta de persoal, destaca CC.OO., súmase tamén a prestación do servizo mediante medios materiais "que se deterioraron co paso do tempo e están obsoletos". Como exemplo, aluden á rotura do circuíto de lavado dos utensilios de cociña no Hospital Clínico, "que leva meses sen funcionar ou funcionando mal, obrigando o persoal a lavar a louza a man".

CHUS, Hospital Clínico de Santiago | Fonte: Sergas