Empregada do fogar furta 100.000 euros á muller á que coidaba, aproveitándose da súa indefensión

O Tribunal Superior de Xustiza de Galicia (TSXG) confirmou a condena de dous anos de prisión imposta pola Audiencia Provincial de Pontevedra a unha empregada do fogar interna por furtar, entre setembro de 2016 e decembro de 2019, un total de 103.730 euros das contas da muller á que coidaba.

Desta forma, desestimou o recurso presentado pola acusada e confirmou a sentenza do tribunal de primeira instancia, que a considerou autora dun delito continuado de furto, agravado pola especial gravidade do feito e o abuso das circunstancias persoais da vítima. O fallo tamén lle impuxo o pago dunha indemnización á vítima de 103.730 euros.

Os maxistrados subliñan que a Audiencia Provincial "baseouse nas declaracións das numerosas testemuñas que depuxeron no acto da vista, na declaración da acusada e na proba pericial, afirmando a existencia dunha pluralidade de indicios converxentes e concluíntes en relación á súa autoría que non deixan lugar a dúbida".

Audiencia Provincial de Pontevedra | Fonte: Arquivo