O 70 % dos docentes galegos que piden axuda ao Defensor do Profesor admiten ter problemas de saúde mental
Esta figura recibiu no último curso 127 chamadas
Por Europa Press / Redacción | SANTIAGO DE COMPOSTELA | 24/11/2022 | Actualizada ás 18:08
A Asociación Nacional de Profesores do Ensino (ANPE Galicia) mostrou a súa preocupación polos problemas de saúde mental, que observan tanto en alumnado como en profesorado debido aos efectos postpandemia, no informe do curso 2021-2022 do 'Defensor do Profesor' que presentaron este xoves na súa sede de Santiago de Compostela.
O presidente do sindicato ANPE na Comunidade galega, Julio Díaz, exemplificou esta situación cos datos dun estudo xa difundido en xuño e realizado pola Sociedade da Información e a Comunicación nos Centros Educativos (SICE), do Ministerio de Educación, que reflicte que o 9,3 % dos 14.000 alumnos de entre 12 e 19 anos enquisados en diferentes comunidades (entre elas, a galega) admite que amagou con suicidarse nalgún momento das súas vidas. Ademais, o 24,4 % destes xa acudiron algunha vez ao psicólogo e o 9,8 % destes mozos sente depresión ou desánimo a diario.
Estes problemas de saúde mental reflíctense tamén no informe do 'Defensor do Profesor' de ANPE, con problemáticas de convivencia, autolesión e faltas de respecto ao profesorado. "Problemas graves" que se suman á "xa de seu afectada saúde mental" do persoal educativo, sector que tamén sufriu as repercusións da pandemia.
Entre os conflitos que ten o profesorado cos alumnos destacan os problemas para dar clase, un 42,52 %, e as faltas de respecto, que nalgúns casos poden desencadear en condutas agresivas. De todos os xeitos, o presidente de ANPE destaca que en Galicia non foi reportada ningunha agresión cara a un profesor por parte dun alumno neste curso.
En canto á relación dos docentes cos pais, as faltas de respecto e as presións para modificar as notas dos seus fillos foron as principais situacións de conflito que reflicte o estudo da organización.
Por todos estes motivos, o sindicato quere pór en valor un ano máis o 'Defensor do Profesor'. Este servizo de atención inmediata e gratuíta para docentes vítimas de situacións de conflitividade e violencia nas aulas posto en marcha por ANPE, recibiu este ano 2.000 chamadas, 127 delas en Galicia. Dato reflectido no informe do curso 21-22 que resumiu o responsable deste servizo na Comunidade, Julio Trashorras.
QUEIXAS Á ADMINISTRACIÓN
A asociación aproveitou tamén esta conferencia para instar á administración galega a que non "mire para outro lado co tema da saúde mental nas aulas".
Opinan que a decisión da Consellería de Cultura, Educación, Formación Profesional e Universidades de formar catro comisións provinciais e unha autonómica de seguemento de benestar e convivencia nos centros educativos "non segue o ordenado desde o Ministerio, coa Guía do Coordinador de Benestar". Figura, a de 'Coordinador do Benestar' proposta polo Goberno central para cada centro educativo, que non aparece nas medidas tomadas pola Xunta, segundo Julio Díaz.
ANPE desconfía tamén do bo funcionamento destas comisións nas que, segundo a asociación, os responsables "teñen contacto cero cos centros educativos". Unha situación que en palabras do presidente da asociación, fai que estes problemas teñan que ser "resoltos polos centros", onde "falta a dotación económica e formación necesaria para solucionalos".
DATOS DO INFORME EN GALICIA
Un total de 127 chamadas tivo durante o último curso o Defensor do Profesor de Galicia, datos similares ao anterior curso. Chamadas que o sindicato clasifica segundo o tipo de intervención que requira a situación de indefensión que está a sufrir o docente: psicolóxicas (50 %), administrativas (30 %) ou xurídicas (20 %).
A etapa escolar da que se reciben máis queixas é a ESO, seguida de preto pola Formación Profesional, na que a desmotivación do alumnado adoita ser a orixe dos conflitos. De todo as chamadas de profesorado que pediron axuda, 71 foron de mulleres e 56 por parte de homes.
O que máis preocupa aos responsable de ANPE é o número de docentes que chaman admitindo que padecen algún tipo de problema de saúde mental. Tan só o 30 % destes negan nun principio presentar ningún tipo de problema anímico.
A vía máis escollida para contactar co defensor do profesorado de Galicia segue sendo a chamada telefónica, para "conservar o anonimato", confesa Julio Trashorras.
