A economía galega aumenta un 2,5% e crea 11.800 empregos ata setembro

O produto interior bruto (PIB) de Galicia mantívose sen variación no terceiro trimestre en relación ao trimestre anterior, pero rexistra un aumento anual do 2,5%, segundo as contas que publica este venres o Instituto Galego de Estatística (IGE). A Consellería de Facenda destaca que o emprego creceu un 1,2% ata finais de setembro, de modo que se crearon máis de 11.800 postos de traballo a tempo completo.

Nos dous anteriores trimestres, o PIB galego anotouse incrementos anuais superiores, do 5,1% no primeiro e do 5,2% no segundo. Mentres, a variación intertrimestral tamén fora superior (+0,6% e +1,3%, respectivamente).

Desde o punto de vista da demanda, neste terceiro trimestre, en variación anual, as exportacións de bens e servizos aumentaron un 8,1% a formación bruta de capital creceu un 0,5%. Con todo, baixou un 6,7% o gasto das administracións públicas e un 1,2% o dos fogares. En variación mensual baixan todas as variables, excepto as exportacións (+0,5%).

No que respecta á oferta, anualmente, os servizos creceron un 4,8%, cun maior incremento no apartado de comercio, transporte e hostalería (+12%); e a construción un 0,6%.

CRECE O EMPREGO

A Consellería de Facenda destaca que o emprego creceu un 1,2% ata finais de setembro, de modo que se crearon máis de 11.800 postos de traballo a tempo completo.

Por ramas de actividade, o emprego creceu un 1,5% no sector da construción, un 1,4% no da industria e un 1,2% en servizos, cun incremento do 3,1% en comercio, transporte e hostalaría.