A Xunta denuncia un "novo agravio" do Goberno central ao excluír a A-52 e a A-6 da petición á UE para modernizar vías

A conselleira de Infraestruturas e Mobilidade, Ethel Vázquez, definiu este martes como "un novo agravio" a decisión do Goberno central de excluír as autovías A-52 e A-6 da petición á Unión Europa de financiamento para a modernización e dixitalización de estradas.

En declaracións aos medios en Madrid, onde participou na reunión do pleno do Consello Nacional da Auga, Vázquez insistiu en que estas dúas autovías "son arterias fundamentais de conexión do noroeste peninsular coa meseta" e destacou "o gran volume de tráfico de mercadorías" que soportan.

Ademais, a titular de Infraestruturas da Xunta sinalou que o Goberno central presenta un plan de financiamento "no que si inclúe a A-8, que beneficia directamente ao País Vasco". Así, insistiu en que "esta decisión é negativa para Galicia, Asturias e todo o noroeste peninsular".

Nesta liña, Ethel Vázquez remarcou que esta decisión "confirma que en materia de infraestruturas, o Goberno central prioriza as necesidades dos seus socios" de investidura e asegurou que "son lesivas para o resto de España".

Ademais, pediu ao Executivo de Pedro Sánchez "planificación e investimento", así como "igualdade de trato para que non siga habendo desigualdade entre os territorios nin desigualdade competitiva".

RESPOSTA DO GOBERNO CENTRAL

O Ministerio de Transportes, Mobilidade e Axenda Urbana subliñou este martes que a A-6 e a A-52 "non van ter menos oportunidades de financiamento", a través das axudas europeas.

Así, segundo trasladou a Delegación do Goberno en Galicia, os fondos europeos do Mecanismo Conectar Europa e os fondos de cohesión ás estradas non distinguen entre a rede básica e a rede global e, aínda que estas vías son rede global, "poderán optar igual aos fondos europeos".