Por Europa Press / Redacción | SANTIAGO DE COMPOSTELA | 02/12/2022 | Actualizada ás 15:52
Renfe recupera a partir do próximo 11 de decembro a totalidade dos servizos que ofrecía antes da pandemia nas liñas entre Ferrol e A Coruña e entre Ourense e O Carballiño, que forma parte da conexión da capital ourensá con Santiago de Compostela.
Nun comunicado, a operadora ferroviaria informou este venres que a recuperación destes servizos modificará algúns dos horarios da liña Ourense-O Carballiño-Santiago "para cubrir ao longo do día máis franxas horarias".
Así as cousas, o próximo 11 de decembro empezará a circular cada día un servizo máis (na actualidade son unicamente dous) entre as localidades da Coruña e Ferrol, en ambos os sentidos. Tamén se recupera o tren Ferrol-Betanzos, suspendido desde a pandemia.
Pola súa banda, na liña Ourense-O Carballiño-Santiago pásase dun a tres trens por sentido, á vez que se reconfiguran os horarios "para adaptalos ás necesidades de mobilidade e cubrir máis franxas horarias de desprazamento".
No comunicado, Renfe asegura que a oferta de trens "está restablecida na súa maior parte" respecto da que había antes do primeiro estado de alarma declarado en marzo de 2020 e que a súa "vontade" é "completar a reposición destes servizos nos próximos meses, a medida que se vaia incorporando o novo persoal de condución".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.