O Parlamento galego queda sen declaración institucional do 25N polas discrepancias sobre a lei do "só si é si"

O Parlamento de Galicia quedouse este ano sen declaración institucional sobre o Día para a eliminación da violencia machista polas discrepancias á hora de incorporar a situación derivada da Lei do 'só si é si', unha cuestión que saíu a relucir no debate dunha iniciativa defendida pola deputada socialista Noa Díaz na tarde noite do xoves e que foi votada este venres.

Así, foi a propia deputada do PPdeG Paula Prado a que lamentou a negativa a incluír esta cuestión na declaración institucional, coincidindo coas resolucións xudiciais que están a revisar á baixa algunhas condenas de agresións e abusos sexuais coa nova tipificación recollida na normativa.

Con todo, a pesar de que o Parlamento de Galicia quede sen esta declaración institucional con motivo dunha das materias que máis supuxo división no hemiciclo galego nas últimas semanas, parte da iniciativa presentada por Noa Díaz conseguiu a unanimidade dos votos, co apoio do PPdeG e do BNG, que deu o seu apoio a través da deputada Olalla Rodil.

Concretamente, o texto aprobado recolle que o Parlamento "ratifica o compromiso contra a violencia machista e en defensa dos dereitos das mulleres e contra calquera discurso negacionista e posicionamento político que negue esa violencia ou que rexeite as políticas enfocadas á súa total erradicación".

Nun segundo punto deste apartado, a Cámara galega mostra o seu apoio ao proceso de renovación e actualización do pacto de Estado contra a violencia de xénero que se está iniciando no Congreso.

Doutra banda, o Parlamento insta o Goberno galego a presentar un informe de execución das medidas do pacto de Estado desde o seu desenvolvemento, así como o seu impacto e avaliación co fin de establecer prioridades nas súas accións futuras.

Ademais, reclama pór en marcha, en 2023, os sete centros de crises para as vítimas de violencia sexual, un en cada área sanitaria, para prestar atención integral as 24 horas do día, os 365 días do ano.

Finalmente, tamén se solicitou ao Observatorio Galego da Violencia de Xénero que, ao finalizar os traballos do grupo técnico, sobre o seguimento do pacto, traslade as súas conclusións ao Parlamento.