O programa 'O teu Xacobeo' beneficiou dende 2019 a case 700 proxectos en toda Galicia
O ano pecharase mínimo con 440.000 peregrinos e coa recuperación dos camiñantes internacionais
Por Europa Press / Redacción | SANTIAGO DE COMPOSTELA | 07/12/2022 | Actualizada ás 16:41
A directora de Turismo de Galicia, Nava Castro, fixo balance do programa 'O teu Xacobeo', para o que a Xunta destinou máis de 9,5 millóns de euros e que en total, nas tres edicións, beneficiou a case 700 proxectos.
Esta iniciativa é unha convocatoria de axudas creada en 2019 co obxectivo de involucrar á poboación galega na celebración do dobre Ano Santo 2021-2022 mediante proxectos socioculturais que virasen ao redor da temática do Xacobeo.
Así o explicou Castro este mércores nun acto no Monte do Gozo, na Asociación de Pais de Persoas con Trastorno de Espectro Autista da provincia da Coruña (Aspanaes), unha das entidades beneficiarias do programa, acompañada do presidente desta organización, Ignacio Labella, e a comisaria do Xacobeo, Cecilia Pereira.
Desta forma, Nava explicou que o que buscaban con esta iniciativa era "difundir e diversificar un pouco máis" esa cultura xacobea e que "todas as persoas de Galicia se sentisen participes do Xacobeo".
"Quixemos empezar a facer ruído con esta iniciativa para que chegase a todos os lugares e que non se centralizase todo nas grandes cidades ou na meta da peregrinación como é Santiago de Compostela", apuntou Castro.
220 CONCELLOS E CASE 700 INICIATIVAS
Nesta liña, a directora de Turismo remarcou que "si que o conseguiron" porque chegaron a máis de 220 concellos das catro provincias galegas e "cren que si que chegaron a toda Galicia". Deses case 700 proxectos que foron financiados, 307 foron na Coruña; 193 en Pontevedra; 115 en Lugo e 74 en Ourense.
Así, explicou que se escolleu o Monte do Gozo como "chiscadela" a todos os peregrinos que chegan despois de facer o Camiño, xa dende a época Medieval, e que dende alí visualizan por primeira vez as torres da Catedral de Santiago.
A isto súmaselle, que o centro foi beneficiario da iniciativa e realizou unha páxina web chamada 'Galicia Accesible' que conta con guías adaptadas de diferentes concellos do Camiño de Santiago. O obxectivo é facelo accesible e achegalo ás persoas con Trastorno do Espectro Autista (TEA).
MÍNIMO 440.000 PEREGRINOS
No mesmo acto e a preguntas dos medios, Nava Castro remarcou que o ano se pechará como mínimo con 440.000 peregrinos, aínda que son conscientes de que entre un 30 % e un 50 % dos camiñantes "fano sen recoller as Compostelas".
En canto ao número de turistas puntualizou que son case seis millóns os que chegaron. "Batemos marca, para nós foi o mellor Ano Santo, tiñamos unhas previsións que superamos e tiñamos unhas cifras para 2023 que xa superamos e non só falamos de cantidade senón de calidade", enxalzou Castro.
Ademais, remarcou que "chama a atención" a recuperación de peregrinos de Estados Unidos ou Corea, o que significa que se recuperan os camiñantes internacionais.
