“A decoración de Nadal de Allariz non se entende sen a implicación dos traballadores do concello”, Mª López, concelleira
No ano 2015 o Concello de Allariz comezou a decorar a vila baixo criterios de sostibilidade botando man da creatividade e dedicación dos propios traballadores e traballadoras municipais. A aposta funcionou e, a día de hoxe, Allariz é un dos destinos máis visitados de Galicia no Nadal.
Por X.M. Fernández | Allariz | 13/12/2022 | Actualizada ás 09:00
O venres 2 de decembro o Concello de Allariz presentou a decoración de Nadal e as diferentes localizacións --un total de once-- que se poden ver este ano nas rúas e prazas da vila. Haberá algunhas novidades como por exemplo a localización da Alameda onde reconverteron os antigos apeadeiros da estación de tren en tendas.
Segundo nos conta María López, concelleira de Promoción Económica, a aposta por este tipo de decoración empezou no ano 2015 “buscando unha fórmula harmónica que Allariz se merece para respectar o noso patrimonio e feita con mimo e agarimo”.
Para facer as decoracións mercan o material a provedores locais e o traballo faino persoal do concello, “a decoración de Nadal non se entende sen a implicación dos traballadores do concello”, refire María.
“A decoración de Nadal non se entende sen a implicación dos traballadores do concello”
TRABALLO COLABORATIVO
A orixinal e coidada decoración artesanal de Nadal da vila do Arnoia parte, como nos comenta a concelleira de Promoción Económica, dun traballo en equipo dos empregados e empregadas municipais. O electricista do concello, por exemplo, é o que se encarga do alumeado, deseñando incluso escenografías luminosas. Estas luces son do propio concello, non tendo que contratar nada a ningunha empresa de fóra para estas datas.
Despois, da elaboración e colocación de decorados encárganse traballadores de diferentes áreas do concello e moito do material que necesitan xa vai quedando dun ano para outro. Teñen unha reunión en setembro e valoran que elementos doutros anos poden servir para poder reutilizalos ao tempo que pensan tamén en cousas novas. Do ‘Festival de Xardíns’, por exemplo, aproveitan materiais e estruturas que sobran. Aínda que leva moito traballo para todas e todos, prefiren manter esta filosofía. “O sinxelo sería que unha empresa de fóra o fixese pero nós preferimos facelo así”, afirma María López.
“O sinxelo sería que unha empresa de fóra o fixese pero nós preferimos facelo así”
CONCIENCIACIÓN VECIÑAL
Preguntámoslle á concelleira se nestes anos houbo problemas de vandalismo ou se polo contrario impera a concienciación e o respecto para a conservación dos decorados. A resposta é clara “a xente respecta moitísimo”. Recoñece que algún desperfecto sempre hai, incluso de forma involuntaria, sen malas intencións, pero en xeral os danos a elementos decorativos son anecdóticos.
É máis, cando algún veciño ou veciña atopa algún dano xa avisan ao concello. “Ao mínimo desperfecto a xente avisa e incluso manda fotos dicíndoche ‘mira que en tal sitio falta tal cousa ou mira que alí hai uns rapaces que’...”, comenta María dicindo tamén que “a xente valora o traballo que se fai e sénteo como seu”.
REPERCUSIÓN
A fórmula de apostar pola sostibilidade e traballar co que teñen na casa estalles funcionando moi ben tamén de portas para fóra. Estes últimos anos, Allariz é xa un destino de Nadal para moitas e moitos galegos pero tamén para visitantes de fóra da nosa comunidade.
Neste senso, conta María que dende novembro reciben chamadas para preguntar cando estaría posta a decoración, grupos de viaxe, particulares, etc. E incluso hai xa axencias de viaxe que meten a Allariz no paquete de visita de Nadal para ver as luces de Vigo.
Neste punto preguntámoslle á concelleira se o ‘contraste’ ou ‘a comparación’ con Vigo benefícialles e dinos claramente que “persoalmente o da comparación non me gusta. Nós temos o estilo Allariz e non pretendemos compararnos con ninguén”.
Para rematar, María convida á xente a visitar Allariz, a gozar do día, da decoración de Nadal e da hostalería para que “viva unha experiencia diferente e que lle queden ganas de volver”.
"Nós temos o estilo Allariz e non pretendemos compararnos con ninguén
PROGRAMACIÓN DE NADAL
A veciñanza e aos/as visitantes gozarán, entre o 17 de decembro e o 8 de xaneiro, dun programa de actividades que incluirá teatro, obradoiros, xogos, música, un monólogo de David Amor e outras actividades propias destas datas como a carreira "A Derradeira Solidaria" ou a cabalgata de Reis.
Moitas serán as alternativas de lecer para a cativada. Unha delas será o teatro, con tres funcións para non perder: o 17 e o 23 de decembro, e o 8 de xaneiro estarán ás 18:00 h. na Casa da Cultura de Allariz as obras Quixote, A Tartaruga e Asemblea Xeral. E o domingo 18 a escola da Banda Unión Musical de Allariz celebrará un concerto pola mañá no mesmo recinto. Outra opcion para as pequenas e pequenos --ata 12 anos-- será o Nadal Parc, un espazo para gozar de inchables, obradoiros e xogos no pavillón do IES de Allariz do 26 de decembro ao 3 de xaneiro.
Para a mocidade está programada o venres 23 o Campo da Barreira un concerto de Son da Rúa e dos Djs Markox e Paulo Seoane a partir das 23:00 h.
A carreira popular "Derradeira Solidaria" celebrarase na mañá do 31 de decembro comezando ás 11:00 h. a de adultos e ás 11:15 h. a infantil. A saída farase dende a Praza Maior.
E xa metidos no 2023, a tradicional Cabalgata de Reis o 5 de xaneiro ás 18:30 h. con percorrido dende a Alameda ata o Pavillón do IES de Allariz. E un monólogo de David Amor o día 7 de xaneiro ás 22:00 h. na Casa da Cultura.
