Os socialistas piden a Feijóo que aclare se considera "un amaño" a elección da Coruña como sede da Aesia
O senador do PP por Granada José Antonio Robles afirmou que non foi un proceso limpo.
Por Europa Press / Redacción | SANTIAGO DE COMPOSTELA | 18/12/2022 | Actualizada ás 14:43
O secretario de Organización do PSdeG, José Manuel Lage Tuñas, pediu a Feijóo que "aclare se cre que a elección da Coruña como sede da Axencia Estatal da Supervisión da Intelixencia Artificial (Aesia) foi un "amaño", como sinalou o senador popular por Granada, José Antonio Robles, que instou este domingo ao alcalde da cidade andaluza a pedir ao presidente do Goberno, Pedro Sánchez, que dea a cara para "explicar o amaño" da Aesia.
O responsable socialista respondeu a estas palabras do "compañeiro de escano de Feijóo" no Senado, xa que, sinalou, o PP móstrase "desnortado e sen rumbo cun presidente que ten unha opinión para cada día da semana" e ao que, asegurou, "o 2023 váiselle a facer moi longo".
Nesta mesma liña, Lage Tuñas instou a Alfonso Rueda a "actuar como presidente da Xunta" e non como "o secundario de Feijóo".
O secretario de Organización do PSdeG destacou tamén que foi "un comité técnico o que aprobou por unanimidade a designación da Coruña como sede da Axencia Española de Supervisión da Intelixencia Artificial nunha convocatoria pública con concorrencia competitiva e criterios transparentes publicados no BOE".
Para Lage Tuñas "o PP non acaba de aceptar que A Coruña lidere a Aesia", cunha decisión tomada polo Goberno central "con criterios transparentes e por unanimidade". "Polo que se ve, nin ao PP nin a Feijóo lles gustou a decisión do Goberno de Pedro Sánchez", remarcou.
