Luz, música e danza danse cita na "última peregrinación" antes do peche da Porta Santa

O espectáculo arrincará ás 19.00 horas do 31 de decembro na Praza da Quintana e será emitido pola TVG.

Por Europa Press / Redacción | SANTIAGO DE COMPOSTELA | 21/12/2022 | Actualizada ás 15:28

Comparte esta noticia

Un espectáculo de baile, música e luz a cargo da compañía Nova Galega de Danza, no que se representará de forma artística un "último Camiño de Santiago", será o evento protagonista do peche da Porta Santa, que servirá como clausura definitiva do Xacobeo 21-22.

A función terá lugar o 31 de decembro ás 19.00 horas na Praza da Quintana e contará con ao redor de 100 persoas traballando nela, entre corpo de baile, coro, técnicos e persoal de produción.

Este mércores foi presentada esta actuación nun acto presidido pola directora de Turismo de Galicia, Nava Castro, no que estivo acompañada do director da Axencia Galega das Industrias Culturais (Agadic) da Xunta, Jacobo Sutil, e o director da compañía de danza, Jaime Pablo Díaz.

A presentación celebrouse no centro de acollida de peregrinos, un edificio que, segundo Castro, repartiu ao redor de 440.000 compostelás durante este ano santo. O director de Agadic tamén aproveitou este acto para facer balance do Xacobeo 21-22, no que a cultura viviu dúas etapas diferentes, debido ás restricións da pandemia no primeiro ano.

Jacobo Sutil quixo tamén agradecer á Xunta que unha actuación cultural sexa a protagonista dun "evento tan importante" como é o peche da Porta Santa. Ademais, afirmou que será unha gran ocasión para mostrar a "gran calidade" do sector cultural galego.

ESPECTÁCULO INÉDITO

A compañía Nova Galega de Danza preparou un espectáculo totalmente orixinal para este día, que contará cunha gran cantidade de artistas encima do escenario. O "bosque de voces" do coro 'Sisters in the House' acompañará á voz de Xurxo Fernández e á música de Sergio Moure de Oteyza nunha reinterpretación inédita da 'Negra sombra' de Rosalía de Castro.

Jaime Pablo destacou que esta actuación pretende celebrar "o corpo do camiñante, a terra que pisa e o propio camiño que ten a Galicia por destino". Unha "última peregrinación" a través do baile, a música, o canto, a luz e as sombras ata chegar ao destino final: a emblemática Praza da Quintana de Santiago.

A función finalizará cun espectáculo de luces no que se representará, a través dun 'videomapping', a "última viaxe de peregrinos deste Xacobeo".

A directora de Turismo de Galicia convidou a todos os galegos e galegas a seguir pola TVG este evento que dará comezo ás 19.00 da tarde, xusto despois da misa na Catedral de peche da Porta Santa.

O Arcebispo de Santiago, Julián Barrio, durante o acto solemne de apertura da Porta Santa da Catedral de Santiago, que dá inicio ao Ano Santo 2021, en Santiago de Compostela, a 31 de decembro de 2020
O Arcebispo de Santiago, Julián Barrio, durante o acto solemne de apertura da Porta Santa da Catedral de Santiago, que dá inicio ao Ano Santo 2021, en Santiago de Compostela, a 31 de decembro de 2020 | Fonte: Álvaro Ballesteros

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta