Vixésimo sétima edición do certame 'Tarxetas de Nadal' de Special Olympics

O director xeral de Persoas con Discapacidade, Fernando González Abeijón, presidiu este venres o xurado encargado de escoller os traballos seleccionados no 27 Certame autonómico de Tarxetas de Nadal de Special Olympics Galicia.

Nesta edición participaron, explica o Goberno galego nun comunicado, 32 entidades de toda Galicia e presentáronse ao redor de 965 deseños diferentes.

"Este certame é unha das citas clásicas de Special Olympics Galicia e cada ano conta cunha gran aceptación entre todas as entidades que traballan no ámbito da atención a persoas con discapacidade intelectual", recalcan.

Está previsto que o próximo mes de xaneiro teña lugar o acto de entrega de agasallos aos participantes.

Ademais, o director xeral aproveitou a visita para entregarlle un vehículo adaptado á entidade con cargo á casa social do 0,7 % do IRPF.

Nesta liña, destacou que a colaboración do Goberno galego co seu labor diario continuará durante 2023 porque demostraron "ser un alicerce fundamental para centos de persoas con discapacidade que atopan nos seus proxectos unha mellor calidade de vida".

O director xeral de Persoas con Discapacidade, Fernando González Abeijón, participa na selección de Tarxetas de Nadal de Special Olympics | Fonte: Xoán Crespo