Por Europa Press / Redacción | SANTIAGO DE COMPOSTELA | 23/12/2022 | Actualizada ás 17:59
O conselleiro de Sanidade, Julio García Comesaña, asegurou que non se pode botar "a culpa" ás autonomías da situación na Atención Primaria e, en referencia ao Goberno central, manifestou que o problema está "na formación de médicos especialistas". "A ver se alguén cae da burra", dixo en alusión ao Ministerio de Sanidade.
Fíxoo ao ser preguntado, nun acto na Coruña, pola investigación de oficio do Defensor do Pobo e se se solicitou información respecto diso á autonomía galega.
O conselleiro asegurou que aínda que a Atención Primaria "ten problemas" vinculounos sobre todo á falta de "médicos especialistas". "Non nos deixan formar a máis", dixo sobre o Goberno. Por outra banda, argumentou que "o 82 % dos galegos que piden cita téñena en menos de catro días" nestes centros.
URXENCIAS DO CHUAC
Mentres, preguntado pola situación nas urxencias no complexo hospitalario universitario da Coruña, tras a denuncia de "colapso" por parte da CIG nos últimos días, apelou á "reforma importante" nesta instalación para "adaptarse á demanda".
Confiado en que nas próximas semanas haxa "algún avance" sobre a conclusión dalgunhas obras, insistiu que se busca sempre que os pacientes ingresen na unidade "máis adecuada". "E iso xera, ás veces, un pequeno atraso na subida, que non se pode producir ata que outros pacientes deixan esa habitación". Tamén defendeu que as urxencias do CHUAC teñen "o persoal adecuado".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.