Choivas de máis de 80 litros por metro cadrado deixan case 200 incidencias en Galicia
A Coruña, a provincia onde se rexistraron máis incidencias, mentres que en Narón permanece cortado un tramo da autovía AG-64.
Por Europa Press / Redacción | SANTIAGO DE COMPOSTELA | 24/12/2022 | Actualizada ás 02:52
As choivas das últimas horas en Galicia, que acadaron nalgúns casos os 80 litros por metro cadrado, deixaron 187 incidencias en toda a comunidade, especialmente na provincia da Coruña.
Segundo destacou o 112 Galicia, as localidades de Ferrol, Narón, Cedeira, Mugardos, Valdoviño, a comarca de Bergantiños e Santiago e a súa área de influencia foron os lugares que maior número de intervencións rexistraron por mor das precipitacións e os seus efectos.
De feito, en Narón, a autovía AG-64 permanece cortada á altura do quilómetro 6 desde primeira hora da tarde debido ás balsas de auga que se acumularon na vía polo desbordamento dun río. Segundo fontes da Garda Civil de Tráfico, os axentes desviaron a circulación pola estrada AC-862.
Ademais desta incidencia, na provincia da Coruña o 112 Galicia contabilizou 126 intervencións relacionadas coa climatoloxía adversa.
En Pontevedra, os servizos de emerxencia atenderon 44 incidencias, mentres que en Lugo acudiron a 13 e en Ourense a tres. En total, o 112 rexistrou 187 incidencias na comunidade ata as 19,00 horas deste venres.
Así mesmo, destacou que a maioría de intervencións foron por inundacións en rúas, estradas e vivendas e bolsas de auga (máis de 80), caída de árbores (25) e actuacións para a prevención de riscos maiores (31).
A localidade onde se rexistrou maior cantidade de auga foi, un día máis, Santa Comba, con 83,9 litros por metro cadrado. Así mesmo, en Narón caeron 76,5 litros por metro cadrado e en Rois, 70,1.
VENTOS E ALERTAS
Ademais das choivas, o vento tamén foi protagonista nesta véspera de Noiteboa. Segundo os datos de Meteogalicia, en Punta Candieira, no municipio coruñés de Cedeira, rexistráronse refachos de vento de máis de 120 quilómetros por hora.
Mentres, en Xesteiras, en Cuntis alcanzáronse o 113,1 km/h e na Pontenova Meteogalicia rexistrou ventos de 105 km/h.
A Dirección Xeral de Emerxencias e Interior da Vicepresidencia Segunda da Xunta mantén activa unha alerta laranxa por choivas no suroeste da Coruña.
Segundo a Axencia Estatal de Meteoroloxía (AEMET), o fenómeno meteorolóxico adverso de nivel laranxa podería deixar unha precipitación acumulada en 12 horas que podería alcanzar os 80 mm.
Nesta mesma provincia está tamén activa a alerta amarela por choivas desde primeira hora da mañá deste venres no nordés, oeste, suroeste e interior cunha precipitación acumulada que podería alcanzar os 40 mm. en 12 horas e os 15 mm. nunha hora.
A alerta amarela esténdese ademais á zona das Rías Baixas de Pontevedra, onde a precipitación acumulada poderá alcanzar os 40 mm en 12 horas e os 20 mm. nunha hora.
