Por Europa Press / Redacción | SANTIAGO DE COMPOSTELA | 26/12/2022 | Actualizada ás 17:57
O coordinador de Podemos Galicia, Borja San Ramón, criticou o "abandono da lingua" galega por parte da Xunta tras coñecerse o último informe publicado polo Instituto Nacional de Estatística que "certifica a perda de falantes que sofre o galego" e que "coloca por primeira vez o castelán como idioma máis falado da comunidade".
Para San Ramón, a situación é "dramática" e responsabiliza á Xunta pola súa "absoluta desatención". "O PP de Rueda e Feijóo é responsable de década e media de inanición orzamentaria do galego", asegurou o dirixente de Podemos Galicia.
Así mesmo, destacou que as partidas de normalización lingüística "reducíronse nun 92%". Do mesmo xeito, lamentou que as contas aprobadas polo Goberno galego para 2023 "nin recoñecen o problema nin achegan solucións".
Nunha nota de prensa, Podemos Galicia cualificou a situación de "grave incumprimento da Carta Europea das Linguas Rexionais e Minoritarias". Neste contexto, a formación morada aposta por "recuperar o espazo do galego na educación" que, engadiu, "foi reducido polo Decreto de Plurilingüismo".
Nesta mesma liña, Podemos Galicia avoga por "recuperar o financiamento das políticas de normalización lingüística e polo uso da TVG como ferramenta efectiva de dinamización cultural". "O Goberno da Xunta debe cumprir coas súas obrigacións legais de garantir os dereitos lingüísticos dos galegofalantes", proclamou.
Ademais, Borja San Ramón criticou a Alfonso Rueda polo que considera "un intento de ocultar a situación". Así, censurou que o Instituto Galego de Estatística "leva desde 2018 sen publicar informes sobre o uso do galego". "A falta de transparencia da Xunta demostra que son conscientes do fracaso do seu modelo", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.