Estrease o primeiro gran documental sobre os protagonistas da traxedia de Angrois
Vinte vítimas, veciños e persoal de emerxencia falan sobre o que aconteceu aquel fatídico 24 de xullo de 2013. A produción está realizada polo colectivo Lentes Diverxentes que, de xeito desinteresado, altruísta e autofinanciado trata de sacar á luz problemáticas sociais desde o punto de vista de quen as padece.
Por Galicia Confidencial | Compostela | 28/11/2014 | Actualizada ás 12:37
Máis dun ano despois da traxedia do Alvia 04155 en Angrois, as vivencias persoais e as interrogantes sobre por que descarrilou o tren aquel 24 de xullo seguen no pensamento dos que lles tocou estar alí. Vítimas, familiares, profesionais dos servizos de urxencia e persoas anónimas que colaboraron no rescate son a única voz deste documental de testemuñas que intentan superar aquela data, recordando os seus, e reclamando que se investigue e se esclareza a verdade.
Despois de seis meses de traballo, o colectivo sen ánimo de lucro, Lentes Diverxentes, formado por catro traballadores do audiovisual (Emilio Carral, Fran Piñeiro, Marcos Budiño e Susana S. Recouso) saca á luz o seu primeiro documental, no que se aproxima ás vivencias e sentimentos daqueles que sufriron o accidente de Angrois en primeira persoa. O trailer desta produción xa se puido ver o pasado 23 de xullo, cando este colectivo audiovisual e Galicia Confidencial organizaron unha mesa redonda con vítimas, veciños e especialistas.
Vai xa un ano e 4 meses do accidente, e do shock e desconcerto dos primeiros momentos vítimas e familiares loitan agora pola creación dunha comisión de investigación no Parlamento na que se depuren as responsabilidades políticas deste caso. Esixen que se reparen os danos causados e que se garanta que se tomarán todas as medidas necesarias para evitar que un accidente semellante poida ocorrer.
O documental Angrois no Esquecemento está narrado por unha vintena de voces que, con repouso e reflexión, intentan asimilar e explicar o que supuxo nas súas vidas a traxedia do Alvia: Familiares que se esmeran por superar o dó e as ausencias que deixou o accidente; superviventes que loitan coas secuelas físicas e psicolóxicas daquela data; profesionais que admiten como se viron superados pola magnitude da traxedia, e que contan o tempo que tardaron en asimilar xornadas interminables de traballo nas que perderon a noción do tempo; e veciños e persoas anónimas que se botaron ás vías sen pensalo e a quen conveteron en heroes sen eles buscalo.
O colectivo Lentes Diverxentes comeza a súa andaina coa idea de contribuír ao cambio dunha sociedade na que, a miúdo, hai voces que non se chegan a escoitar. Ese é o proxecto dun grupo de catro persoas que, de xeito desinteresado, altruísta e autofinanciado trata de sacar á luz problemáticas sociais desde o punto de vista de quen as padece.
Este primeiro traballo é o resultado dunha iniciativa menos ambiciosa, que na primavera deste ano aspiraba só a recoller as vivencias dalgúns protagonistas. Pero o contacto con estas testemuñas foi conducindo a novas voces e desvelando novos datos que en moitas ocasións non recollía a actualidade informativa dos medios.
O documental, que se estrea este venres ás 22.30 no Centro Galego de Arte Contemporánea dentro do festival Cineuropa, poderase ver en breve a través da propia páxina www.angroisnoesquecemento.com. Nela xa teñen voz os seus protagonistas e pódese ademais acceder ao avance que se presentou con motivo do aniversario o 23 de xullo deste ano.
Ficha técnica:
Dirección: Emilio Carral, Susana S. Recouso
Guión: Emilio Carral, Susana S. Recouso.
Fotografía: Marcos Budiño, Fran Piñeiro.
Música: Kevin MacLeod.
Produción: Colectivo audiovisual Lentes Diverxentes.
ENLACES:
Tráiler: http://www.angroisnoesquecemento.com/pages/trailer
Protagonistas: http://www.angroisnoesquecemento.com/pages/protagonistas
