Galicia ten escaseza de axentes da Policía Autonómica

Representantes do Sindicato Unificado de Policía (SUP) en Galicia mantiveron unha reunión este xoves co vicepresidente segundo da Xunta, Diego Calvo, para expor a escaseza de efectivos dentro da Policía Autonómica e instaron ao Goberno galego a convocar con urxencia un Concurso Específico de Méritos.

Neste contexto trasladaron, a través dun comunicado, que a Policía Autonómica galega conta con 363 policías, o número máis baixo dos últimos 20 anos e desde xuño de 2013 non se volveron a convocar prazas para a UPA.

Debido a isto, desde o SUP manifestaron que é de "vital importancia" a convocatoria dun Concurso Específico de Méritos, que siga uns criterios obxectivos, coa eliminación da entrevista persoal e que se premie a antigüidade no Corpo como factor decisivo no proceso de selección.

Así mesmo, o sindicato subliñou que contar con 500 postos de traballo é insuficiente e propoñen amplialos a 600 para poder abrir algunha nova comisaría en Ferrol ou nalgunha localidade das provincias de Ourense e Lugo.

Ademais, propuxeron que as vacantes anuais sexan ofertadas no primeiro trimestre do ano seguinte, para garantir así o mesmo número de funcionarios na Unidade e evitar o déficit ao longo dos anos.

Noutros asuntos, solicitaron ao vicepresidente segundo a súa implicación para modificar o acordo de colaboración entre a Xunta de Galicia e o Ministerio do Interior en materia de vixilancia dos edificios xudiciais no Tribunal Superior de Xustiza, na Audiencia Provincial de Pontevedra, na Sección a Audiencia Provincial de Vigo e nos xulgados de Santiago de Compostela.

Segundo traslada o SUP, a Xunta comprometeuse a estudar cada unha das reivindicacións e a dar unha resposta ás mesmas, de forma que é un obxectivo "prioritario" a cobertura das vacantes.

Representantes do SUP reuníronse hoxe co Vicepresidente Segundo da Xunta de Galicia. SUP | Fonte: Europa Press