Xa se poden solicitar as axudas para a contratación de seguros agrarios, incluidos os de retirada de animais mortos nas explotacións
A Xunta destina 8,5 millóns en 2023 a axudas para o fomento da contratación de seguros agrarios, un 21 % máis que na convocatoria de 2022.
Por Europa Press / Redacción | SANTIAGO DE COMPOSTELA | 04/01/2023 | Actualizada ás 11:06
A Xunta destina 8,5 millóns en 2023 a axudas para o fomento da contratación de seguros agrarios, un 21 % máis que na convocatoria de 2022.
O Diario Oficial de Galicia (DOG) publica este mércores á orde da Consellería do Medio Rural pola que se establecen as bases reguladoras destas achegas e convócanse para o 2023.
O Goberno galego concederá estas subvencións de forma directa aos agricultores, que poderán beneficiarse sempre que subscriban pólizas de liñas agrícolas do Plan 2023 e de liñas gandeiras dos plans 2022 e 2023, formalizadas este ano.
Tamén poderán recibir estas subvencións os titulares de explotacións de acuicultura continental. Así mesmo, contémplanse os seguros de retirada e destrución de animais mortos en explotacións.
As datas de presentación de solicitudes abarcan desde o 1 de xaneiro ao 1 de decembro en función da liña de seguro da que se trate, así como do tipo de produción asegurable.
