O Sorteo do Neno deixa 2,5 millóns de euros en Lugo
O 2º e 3º premio salpican as catro provincias galegas
Por Europa Press / Redacción | LUGO | 06/01/2023 | Actualizada ás 14:18
O Sorteo do Neno, celebrado este venres 6 de xaneiro, salpicou co seu segundo e o terceiro premio a un total de oito municipios das catro provincias galegas. Destaca Lugo como a máis agraciada, despois de que un establecemento da capital repartise 2,5 millóns de euros ao vender 100 décimos do terceiro.
O segundo premio do Sorteo do Neno, dotado con 75.000 euros o décimo, recaeu sobre o 72.289, vendido de forma moi repartida por toda España. En Galicia, deixou 'beliscos' en oito municipios: Vigo, Pontevedra, Cangas, O Carballiño, Ourense, Lugo, Cervo e Ordes.
En Vigo, foi o Bar Imperial, situado en Sanjurjo Badía, 216, o establecemento que vendeu tres décimos da cifra agraciada co segundo premio. Aínda que no local descoñecen a quen lle puido tocar, aseguran a Europa Press que están "contentísimos" e "xa celebrándoo".
Tamén na provincia de Pontevedra, o 72.289 vendeuse en Cangas, concretamente en Aldán. Caeu no estanco de Rozabales, aínda que o seu responsable, Chelo Millán, di a Europa Press que aínda descoñecen canto repartiron.
"Estamos contentísimos", admite. E é que, ademais de que xa repartiron o segundo premio do Neno de 2021, hai pouco máis dun mes este negocio deu 4 millóns de euros coa Bonoloto a un dos veciños. "Entón, agora xa nos saímos. A sorte atopou o camiño", celebra Millán.
Ademais, o segundo premio vendeuse nunha administración de Pontevedra cidade, concretamente a situada en rúa Eduardo Pondal, 50.
SEGUNDO PREMIO EN LUGO
Na provincia de Lugo, a máis agraciada neste Sorteo do Neno de 2023 das catro galegas , un establecemento de Lotarías de Cervo vendeu dous décimos deste segundo premio, dotado con 75.000 euros cada un.
Trátase do hotel e restaurante O Almacén, situado na estrada de Sargadelos, 2, que tamén conta con outras terminacións agraciadas por este Sorteo do Neno de 2023.
"Estamos contentos, porque isto (repartir un dos grandes premios) sempre aumenta moitísimo as vendas", celebra o seu dono, Tomás Mariño, en declaracións a Europa Press.
Mentres tanto, na cidade de Lugo, o Café do Centro, establecemento hostaleiro da Praza Maior, vendeu un décimo do 72.289 por máquina.
Esta cifra tamén deixou 'beliscos' en administracións de Ourense (Cafetaría Iglú), O Carballiño (Bar Lérida) e Ordes (avenida Alfonso Senra, 129).
O TERCEIRO PREMIO DEIXA 2,5 MILLÓNS EN LUGO
En paralelo, un establecemento de Lotarías situada na capital lucense foi o que coroou a esta provincia como a máis afortunada este venres, Día de Reis.
A administración número 9, situada en Rolda da Muralla, 61, foi un dos únicos tres puntos de toda España, xunto con outros dous de Guillena (Sevilla) e Alzira (Valencia), en vender o 18.918.
En concreto, venderon 100 décimos, a maioría a través do Bar Avenida de Rábade. Isto tradúcese nun total de 2,5 millóns de euros.
José Manuel Gómez, o responsable da administración, explica a Europa Press que están "moi contentos" porque sospeita que tocou entre veciños coñecidos. E é que este 18.918 é un dos seus números abonados, polo que levan xa tempo xogando con el.
