Iniciativa parlamentaria do PPdeG para pedir a rebaixa do IVE en alimentos do mar

O PPdeG rexistrou unha iniciativa no Parlamento de Galicia para solicitar ao Goberno central que "rectifique" e rebaixe o IVE dos produtos do mar, para que teñan "o mesmo trato fiscal que outros alimentos básicos e de primeira necesidade".

Esta medida, tal e como argumentan os populares na resolución desta proposición non de lei (PNL) á que tivo acceso Europa Press, busca ser un "apoio para as familias con rendas baixas ou en situación de vulnerabilidade", á vez que beneficiar ao conxunto do sector pesqueiro e marisqueiro fomentando o consumo saudable dos seus produtos.

Esta iniciativa xorde despois de que a finais de decembro o Consello de Ministros aprobase un real decreto-lei con medidas para conter a inflación, entre elas rebaixar o IVE a alimentos básicos como as froitas, as verduras, as hortalizas, os ovos e o leite, entre outros, aínda que sen incluír produtos do mar.

O PPdeG, na exposición de motivos da PNL, afea ao Goberno que "inexplicablemente peixes, mariscos e conservas", a pesar de ser "altamente saudables e imprescindibles para unha dieta completa", están excluídos desta medida.

Ademais, os populares lamentan que o Executivo de Pedro Sánchez "tampouco tivo en conta o impacto que neste sector está a provocar o incremento de prezos da cesta da compra e que se traduce nunha progresiva diminución do consumo" destes alimentos por parte dos fogares, especialmente os de rendas máis modestas.

Para esta proposición non de lei, que se debaterá no Parlamento, o PPdeG recolle así unha reivindicación "unánime" do sector.

Pescadores descargan o peixe e o marisco capturado no Porto de Burela, a 21 de decembro de 2022 | Fonte: Carlos Castro