Por Europa Press / Redacción | SANTIAGO DE COMPOSTELA | 08/01/2023 | Actualizada ás 16:13
O director xeral de Defensa do Monte, Manuel Rodríguez, recibiu no Centro de Coordinación Central de Defensa Contra Incendios Forestais a representantes da asociación de nais e pais de persoas con discapacidade intelectual da comarca de Sar (Amipa).
Segundo destacou a Xunta, esta asociación acompaña e presta apoio a persoas adultas con discapacidade nunha contorna rural e está interesada en coñecer recursos e contribuír a sensibilizar sobre o coidado e a protección do medio.
Nesta liña, o presidente, a directora-xerente e a coordinadora de Amipa, destacou a Consellería do Medio Rural, agradeceron a posibilidade de coñecer de primeira man o traballo do Centro de Coordinación e os medios dos que dispón.
Ademais, valoraron posibles colaboracións para que os usuarios desta asociación poidan coñecer máis a fondo os servizos de prevención. Amipa xestiona un centro de atención diúrna para persoas con discapacidade intelectual en Rois, no Centro Ocupacional de Sorribas, no que participan 24 usuarios con discapacidade.
Entre as actividades que desenvolve Amipa atópase unha horta ecolóxica na Casa Reitoral de Sorribas, para que os usuarios do centro poidan participar de forma activa coa contorna rural que os rodea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.