Dous falecidos e 72 feridos nos 57 accidentes da ponte de Reis en Galicia
O maior día de sinistros tivo lugar o 6 de xaneiro, día de Reis.
Por Europa Press / Redacción | SANTIAGO DE COMPOSTELA | 09/01/2023 | Actualizada ás 10:45
A ponte do Día de Reis deixou un balance nas estradas galegas de 57 accidentes de circulación que causaron 72 feridos e dous falecidos. Así figura na recompilación das incidencias xestionadas por Urxencias Sanitarias 061 entre o mediodía do xoves 5 de xaneiro e a medianoite deste domingo.
En total, a central de emerxencias recibiu 72 chamadas para alertar de 57 accidentes, 20 deles rexistrados no Día de Reis, xornada con maior sinistralidade do fin de semana. Pontevedra foi a provincia con máis accidentes de tráfico durante a ponte con 24, seguida da Coruña (14), Lugo (10) e Ourense (9).
En 58 dos casos atendidos os feridos foron evacuados a centros sanitarios, mentres que 12 recibiron atención no propio lugar do accidente.
Así as cousas, a ponte de Reis deixa dous falecidos nas estradas galegas. O primeiro produciuse o venres día 6 nun sinistro en Caldas de Reis (Pontevedra) no que morreu un home de 54 anos.
Un día máis tarde, o sábado 7 de xaneiro, outro home, de 41 anos de idade, faleceu nun accidente na A-52 en Salceda de Caselas no que tamén resultaron feridas a súa muller e a súa filla de 13 meses.
