Ourense non estará presente en Fitur porque "é unha actividade estéril, endogámica e custosa", segundo Jácome
O rexedor asegura que facer o vídeo de presentación que se expón cada ano adoita custar 15.000 euros máis IVE.
Por Europa Press / Redacción | OURENSE | 10/01/2023 | Actualizada ás 18:20
O Concello de Ourense non asistirá este ano a Fitur, a feira internacional de turismo que se realiza a finais de xaneiro en Madrid. Así o trasladou o rexedor, Gonzalo Pérez Jácome, asegurando que non realizará a habitual "autopresentación" da cidade porque "é unha actividade estéril, endogámica e custosa".
O alcalde explicou este martes que participou nas dúas edicións anteriores porque era o Partido Popular quen xestionaba a área de turismo e termalismo do concello, "e sempre apostou por esta actividade". Con todo, relatou que, ao acudir "a dar o speech como alcalde", o que viu é que "claramente é algo endogámico porque as persoas que escoitan e ven esas presentacións son xente de Ourense e, como moito, algún galego de paso".
Por iso, considera que "non se promociona para nada Ourense". "Non ten sentido facer publicidade de Ourense para os ourensáns que xa o coñecen, o turismo hai que promocionalo cara a fóra", dixo.
Para Jácome, Fitur é unha "feira internacional impresionante" a nivel privado, pero que a nivel público é unha feira que "se fai soamente polo tema de relacións e pouco máis", insistindo en que "de pouco serve para a promoción pública". Ademais, sinalou que facer o vídeo presentación que se expón cada ano adoita custar 15.000 euros máis IVE e "é tirar tempo e diñeiro".
Así as cousas, o alcalde sostivo que o grupo de goberno "ten que ser coherente co seu propio criterio", polo que a cidade estará presente na feira só dentro do expositor da Xunta de Galicia, que promocionará as catro provincias galegas.
