Por Europa Press / Redacción | SANTIAGO DE COMPOSTELA | 16/01/2023 | Actualizada ás 16:04
O Sindicato Labrego Galego (SLG) pediu á Xunta máis fondos para que as axudas ao sector cárnico que buscan compensar as dificultades económicas derivadas da invasión rusa de Ucraína, complementarias ás publicadas polo Ministerio de Agricultura, cheguen a todas as granxas admitidas.
Nun comunicado, apunta que foi a propia Xunta quen elaborou a listaxe de beneficiarias para o Ministerio, polo que se queixa de que non adxudicase de oficio estas axudas complementarias de forma directa "no canto de incrementar a carga burocrática" para as explotacións.
Segundo os cálculos do Sindicato Labrego, os beneficiarios das axudas do Ministerio foron 11.854 en Galicia, de forma que o total orzado pola Xunta debería ser de 18,4 millóns e non de só uns 17,2 millóns. Así, demanda que se aumenten os fondos en máis de 1,2 millóns de euros.
Ademais, lamenta que o establecemento de tramos para calcular a axuda é "inxusto e incongruente", posto unha granxa que teña catro vacas "vai cobrar o mesmo que unha que teña 10".
Igualmente, refírese á problemática respecto ao adianto da axuda por parte de entidades bancarias. E é que "a Consellería afirmou que non ía implicar custos para os solicitantes", pero "en varios casos supuxo o cobro de taxas, a obrigación de contratación de determinados produtos da entidade bancaria e mesmo unha taxa de penalización por cancelación".
É máis, chama a atención acerca de que pode darse o caso de que "algunhas granxas teñan que devolver parte da axuda adiantada", dado que "o cálculo do complemento en base a tramos pode implicar un importe final inferior ao adiantado".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.