Denuncian a "deterioración" na helisuperficie do 061 en Santiago e piden o seu arranxo

CIG-Saúde sinalan que existe "perigo para os traballadores" do 061, persoas usuarias do hospital de Conxo e viandantes que discorran pola zona nas manobras de despegamento e aterraxe.

Por E.P. | SANTIAGO DE COMPOSTELA | 20/01/2023 | Actualizada ás 17:32

Comparte esta noticia

CIG-Saúde denunciou o estado de "deterioración" no que está a helisuperficie do 061 en Santiago de Compostela e reclama que se "cumpran os compromisos adquiridos" pola empresa adxudicataria, recollidos no prego de condicións, para "evitar os riscos que, a consecuencia do abandono, supón para o persoal do servizo de urxencias sanitarias". Pola súa banda, o 061 asegura que xa se iniciou o proceso para a súa reparación.

Segundo explica a CIG nun comunicado, o portalón de entrada e o valado están "rotos". "As bisagras e suxeición central do portal están rotas e o valado presenta grandes ocos por onde se poderían coar na zona restrinxida persoas ou animais", advirten.

Xunto a iso, sinalan que existe "perigo para os traballadores" do 061, persoas usuarias do hospital de Conxo e viandantes que discorran pola zona nas manobras de despegamento e aterraxe.

Neste sentido, aseguran que estas deficiencias foron postas en coñecemento da Fundación Pública Urxencias Sanitarias de Galicia-061 e da empresa adxudicataria do servizo de transporte aéreo urxente Eliance, "sen que se arranxase a día de hoxe".

Aínda que o expediente AB-FUS1-17-019, no prego de prescricións técnicas particulares para a contratación do servizo de transporte sanitario urxente aéreo establece que a empresa adxudicataria "será a encargada de realizar o mantemento da helisuperficie hormigonada e valada", CIG denuncia que "o 061 non obriga a Eliance a que arranxe os defectos" e, á espera de que se "aclaren", o "perigo persiste".

En resposta a estas manifestacións, a Fundación 061 sinalou que realiza "un estrito seguimento dos pregos de contratación, nos que se basea a concesión do servizo de transporte sanitario urxente aéreo con empresas privadas".

Así, na súa contestación remitida a Europa Press, subliña que se están iniciando obras para o mantemento e acondicionamento da helisuperficie da base de Santiago, á espera de "a entrega do material adecuado para a execución da obra", que se realizará "o máis axiña posible".

CIG denuncia mal estado da helisuperficie do 061 en Santiago. CIG
CIG denuncia mal estado da helisuperficie do 061 en Santiago. CIG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta