Febreiro será o mes en que comezarán as probas para xestor de transporte por estrada e haberá tres quendas
As inscricións presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia.
Por Europa Press / Redacción | SANTIAGO DE COMPOSTELA | 25/01/2023 | Actualizada ás 14:21
O Diario Oficial de Galicia (DOG) publica este mércores a resolución da Consellería de Infraestruturas e Mobilidade pola que se convocan as probas de competencia profesional para o desempeño das funcións de xestor de transporte en empresas por estrada para 2023.
Como novidade respecto da convocatoria de 2022, o calendario establecido para estas probas obrigatorias de competencia profesional, tanto na súa modalidade de mercadorías como na de persoas viaxeiras, pasará de dúas a tres quendas --que se realizarán no primeiro, segundo e terceiro cuadrimestre--. Tamén se inclúe como requisito para poder concorrer ás probas ter residencia habitual na comunidade autónoma.
Así, establece a primeira quenda dos exames entre o 14 de febreiro e o 30 de abril; o segundo, entre o 2 de maio e o 31 de agosto; e o terceiro a quenda, entre o 2 de setembro e 31 de decembro de 2023.
Os interesados en participar na primeira convocatoria das probas de xestor de transporte terán desde este xoves e ata o 13 de febreiro para presentar a súa solicitude.
As persoas que desexen acceder á segunda convocatoria disporán desde o 14 febreiro e o 1 de maio para presentar a solicitude; mentres que os interesados en participar na terceira quenda poderán inscribirse desde o 2 de maio ao 31 de setembro.
As inscricións presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia.
