O home perdido mentres ía ao Hospital de Chaves aguantou ata -6º

Foi atopado na parroquia verinesa de Feces de Arriba.

Por Europa Press / Redacción | Ourense | 29/01/2023 | Actualizada ás 12:56

Comparte esta noticia

Os servizos de emerxencia localizaron con vida ao home que na tarde deste sábado alertou ao 112 Galicia de que se desorientara na parroquia de Mandín, no municipio ourensán de Verín, cando se dirixía ao centro hospitalario portugués de Chaves.

Segundo confirmou o 112 a Europa Press, o home foi atopado sobre as 11,00 horas deste domingo na parroquia verinesa de Feces de Arriba, en concreto, nunha ponte do cruzamento que vai cara a Vilarello.

Unha vez localizado, aínda que en aparencia presentaba bo estado, a Garda Civil solicitou a intervención dos servizos sanitarios para que se lle realice un recoñecemento médico tras pasar a noite á intemperie nunha zona na que se rexistraron temperaturas de ata -6ºC.

Á primeira hora deste domingo, o operativo de procura renovábase coa colaboración doutros recursos da Garda Civil, que coordinou a procura, como cans de rescate ou equipos especializados en procuras en montaña, ademais da axuda de drones e dun helicóptero.

Durante a noite, os axentes conseguiron contactar en diversas ocasións co home que, "a pesar do frío, a fame e a desorientación", mantivo en todo momento a colaboración co operativo de procura.

Na súa primeira comunicación cos xestores de emerxencias, o home explicou que abandonara o seu vehículo ante a imposibilidade de avanzar debido ao xeo, polo que decidiu continuar o percorrido a pé porque se atopaba mal. Foi nunha zona de serra, na parroquia verinesa de Mandín, cando contactou coa central de emerxencias ao atoparse desorientado.

Deste xeito, os operadores do 112 deron aviso á Garda Civil, que lograron localizar o coche abandonado, pero non ao dono que chamara a emerxencias.

Así, co obxectivo de acelerar a procura, os axentes do Instituto Armado solicitaron a colaboración dos integrantes das agrupacións de Protección Civil máis próximas, como a de Vilardevós ou Cualedro, ademais da de Verín.

Dous homes camiñan entre a néboa
Dous homes camiñan entre a néboa | Fonte: Carlos Castro - Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta