A oposición incidirá na sanidade nun debate parlamentario no que a Xunta presentará liñas para ter chan industrial
Todo iso producirase a poucos días da manifestación convocada pola plataforma SOS Sanidade Pública en Santiago que conta co respaldo de BNG e PSdeG e que foi tachada de "política" pola Xunta.
Por Europa Press / Redacción | SANTIAGO DE COMPOSTELA | 31/01/2023 | Actualizada ás 19:20
A situación da sanidade pública de Galicia volverá estar no centro do debate no próximo pleno do Parlamento galego, ante o que comparecerá a conselleira de Medio Ambiente, Territorio e Vivenda, Ángeles Vázquez, para explicar as principais liñas da política do Goberno galego en materia de chan industrial.
A orde do día da segunda sesión ordinaria de 2023, que terá lugar os días 7 e 8 de febreiro, foi configurada este martes nunha xunta de portavoces que se estendeu máis da súa duración habitual polo debate aberto polos grupos por mor dos usos das instalacións do Pazo do Hórreo tras a fotografía de alcaldes do BNG coa súa líder, Ana Pontón, na escalinata da fachada principal.
Os grupos, que decidiron abrir un período de "reflexión" sobre o emprego das dependencias da sede do Lexislativo galego, deron forma ao esqueleto da próxima sesión plenaria, no que predominan os asuntos de índole sanitaria.
Tanto o grupo de goberno --o PP-- como a oposición --BNG e PSdeG-- levarán ao hemiciclio distintas iniciativas e preguntas sobre asuntos de sanidade, que será a protagonista absoluta no enfrontamento parlamentario do presidente da Xunta, Alfonso Rueda, coa nacionalista Ana Pontón e o socialista Luís Álvarez.
Todo iso producirase a poucos días da manifestación convocada pola plataforma SOS Sanidade Pública en Santiago que conta co respaldo de BNG e PSdeG e que foi tachada de "política" por parte do propio Roda na liña do expresado polo conselleiro de Sanidade, Julio García Comesaña, días antes.
LEI CRTVG E COMPARECENCIA ANXOS VÁZQUEZ
A segunda sesión parlamentaria do ano comezará co debate da toma en consideración dun texto lexislativo promovido polo BNG para reformar o modelo de elección do equipo directivo da Corporación Radio Televisión de Galicia.
"Tomámoslle a palabra ao senador por designación autonómica, que di que hai que rescatar e despolitizar os medios públicos. Que empece por aplicarse en Galicia", aseverou a viceportavoz parlamentaria do Bloque, Olalla Rodil, en alusión ao expresidente da Xunta e líder do Partido Popular, Alberto Núñez Feijóo.
A continuación subirá ao estrado do hemiciclo por iniciativa propia a conselleira de Medio Ambiente, Territorio e Vivenda, Ángeles Vázquez, para debullar as accións da Xunta en materia de chan empresarial.
No centro da comparecencia de Vázquez, segundo explicou o portavoz dos populares na Cámara, Pedro Puy; estarán os primeiros pasos da aplicación da lei de áreas empresariais, en vigor desde finais do pasado ano 2022.
PP: XUBILACIÓN MÉDICOS E DIMISIÓN 'PAM'
Así as cousas, o PP empregará a súa maioría absoluta neste pleno para solicitar o apoio da Cámara en dúas cuestións: por unha banda, a proposta de Sanidade para ampliar a idade de xubilación dos médicos de primaria como vía para atallar o déficit de profesionais e, por outro, a petición de dimisión do número dous do Ministerio de Igualdade, Ángela Rodríguez, Pam, polas súas declaracións nas que ironizou coas consecuencias da lei do 'só si é si'.
Ademais, os populares cuestionarán aos membros do Executivo galego sobre a aplicación da gratuidade do transporte urbano para os mozos, o plan de financiamento subscrito recentemente co tres universidades galegas e as accións da Xunta para apoiar ás empresas que teñen dificultades para a cobertura de determinados postos de traballo.
BNG: SANIDADE E FONDO HIPOTECARIO
Pola súa banda, o Bloque redobrará a súa presión sobre a Consellería de Sanidade con tres preguntas orais sobre a situación dos servizos sanitarios en Monterrei, Moaña e Ribeira, así como cunha interpelación que deberá responder o propio García Comesaña e que versará sobre "o colapso" na atención primaria.
A maiores da área sanitaria, os nacionalistas presentan unha proposición non de lei para instar á Xunta a crear un fondo hipotecario financiado nun 75% polas entidades financeiras (o 25% con recursos públicos) para apoiar ás persoas con ingresos inferiores ao salario medio de España e que deben afrontar hipotecas que supoñan máis do 30% deses ingresos.
PSDEG: MOCIDADE E "FALTA DE LEALDADE" INSTITUCIONAL
Por último, o Grupo Socialista introduciu dúas cuestións na orde do día vinculadas á mocidade. Por unha banda, defenderá unha moción para reclamar máis axudas ao aluguer para favorecer a emancipación dos mozos e, por outro, reclamará a revisión das concesións de transporte por estrada ante o "rosario de queixas" que, segundo o portavoz socialista, Luís Álvarez, prodúcense desde a reconfiguración do sistema posto en marcha pola Xunta.
Así mesmo, o PSdeG cuestionará ao Goberno galego polo que entende como "falta de lealdade" institucional pola "non invitación" de alcaldes "que non son do PP" a actos dos conselleiros nos seus municipios.
