Unha muller con cancro de endometrio, a primeira en recibir tratamento do novo equipo de branquiterapia do CHUS
Este novo sistema facilita acceder a tumores aos que antes non era posible chegar e cubrir mellor as localizacións afectadas.
Por E.P. | SANTIAGO DE COMPOSTELA | 01/02/2023 | Actualizada ás 13:29
Unha muller que padece cancro de endometrio converteuse o martes, 31 de xaneiro, na primeira paciente en recibir un tratamento do novo equipo de branquiterapia do servizo de Oncoloxía Radioterápica do Complexo Hospitalario Universitario de Santiago (CHUS).
Trátase, segundo informa a área sanitaria, dunha tecnoloxía adquirida pola Xunta por 500.000 euros --co apoio de fondos europeos de recuperación-- para tratar pacientes con cancros xinecolóxicos, prostáticos, dermatolóxicos ou, mesmo, benignos.
A braquiterapia é unha técnica de radioterapia que permite aplicar unha fonte radioactiva directamente no tumor, o que posibilita empregar doses máis altas e minimizar os danos na zona circundante. Este novo sistema facilita acceder a tumores aos que antes non era posible chegar e cubrir mellor as localizacións afectadas.
As doutoras Ana Varela Pazos, Mariluz Couselo Paniagua, Nuria Salvador Garrido, Paula Peleteiro Higuero e Ana Carballo Castro son as oncólogas radioterápicas encargadas de administrar a braquiterapia na área compostelá.
O pasado ano realizáronse neste servizo 174 implantes --unha media de catro por paciente--, un número que a área sanitaria espera que aumente grazas á nova adquisición e as súas aplicacións.
