Ana Pontón presenta ao candidato do BNG en Lalin, Paco Vilariño, a quen define "con experiencia e ideas claras"

A portavoz nacional, Ana Pontón, participou no acto de presentación de Francisco Vilariño como candidato á Alcaldía de Lalín, do que destacou que coñece o concello "como a palma da man", ademais da súa "capacidade, experiencia e ideas claras para darlle ao concello un futuro mellor nun contexto de crise".

Pontón resaltou as dificultades a afrontar polo municipio, que en Lalín "coñecen moi ben", sobre todo en canto á sanidade pública."En Lalín sabedes moi ben destes recortes, porque aínda segue pendente a vella demanda colectiva dunha ambulancia medicalizada, unha infraestrutura sanitaria básica, que pode marcar a diferenza e mesmo evitar situacións tráxicas, pero que o PP volveu vetar no Parlamento por enésima vez hai apenas dous meses", lembrou.

Con todo, sinalou, "o BNG leva anos apoiando esa reclamación social e veciñal ante un PP que lle segue dicindo non á veciñanza de Lalín, que segue instalado na súa prepotencia e na súa soberbia, un goberno do PP convertido nun perigo para a saúde dos galegos, tras trece anos de recortes e privatizacións. Recortes que agora contan coa complicidade do Goberno local", lamentou.

"Lalín necesita un Goberno municipal cun liderado dunha forza política que non cale ante o Goberno da Xunta nin ante ninguén cando se trata de defender os intereses deste concello e dos seus veciños", recalcou a portavoz nacional.

Tamén no ámbito das infraestruturas, destacou a necesidade de que Lalín conte cun goberno "coherente que non rúa ante unha peaxe da AP-53 que é unha estafa". "Non vale acordarse de que é unha estafa só cando o PP está fóra da Moncloa, porque iso non é defender á veciñanza, é oportunismo político", alegou.

"Este concello necesita un proxecto de goberno capaz de aproveitar todo o enorme potencial, capaz de sacarlle o máximo partido ao seu tecido económico e produtivo", defendeu Pontón, citando como exemplo o sector agrogandeiro, "esencial" para Lalín e referente en Galicia, que necesita medidas de impulso e de apoio ao rural, incluíndo a dotación de servizos.

Igualmente, indicou, Lalín necesita un goberno que busque solucións en materia de chan empresarial, "porque xerar riqueza e emprego é fundamental para reter á xente nova, porque se a mocidade ten que marchar por falta de oportunidades, o concello perderá dinamismo económico e social".

"E para dar resposta a todos estes retos, a mellor alternativa é a que representa o BNG da man de Paco Vilariño, porque o BNG é unha forza confiable, que ten proxecto de futuro e de progreso para Lalín, que coñece as necesidades do concello e sabe como activar todo o seu potencial", argumentou.

"ALTERNATIVA GALEGA Á CRISE"

A líder do Bloque tamén destacou que a campaña das municipais ten lugar nun contexto "moi complexo", de alza de prezos que afecta a bens de primeira necesidade, prezos que soben máis en Galicia a pesar de ter salarios por baixo da media e as segundas pensións máis baixas de todo o Estado. "E todo isto, fronte a un Goberno do PP insensible aos problemas da xente, instalado na rutina, sen proxecto e sen impulso político, incapaz de tomar nin unha soa medida relevante para sacar o País adiante", indicou.

"Somos conscientes das dificultades e dos grandes desafíos, agora máis que nunca. Temos claro que o noso país necesita un cambio de rumbo e estou segura de que neste 2023 imos dar importantes pasos adiante para conseguilo, porque o BNG ten unha alternativa de País e sabe gobernar, e demostrámolo cada día desde os concellos que lideramos. Os gobernos municipais do BNG son gobernos de calidade, eficacia, solvencia e capacidade de transformación para mellorar a vida das persoas. E ese é o mellor aval co que podemos presentarnos ao reto das eleccións municipais de maio", concluíu.

Ana Pontón en rolda de prensa.. BLOQUE NACIONALISTA GALEGO