Por Galicia Confidencial | Touro | 08/02/2023 | Actualizada ás 12:59
Ecoloxistas en Acción púxose en contacto coa Área de Vertidos do organismo Augas de Galicia e coa Policía Autonómica para advertilles dun novo episodio de contaminación ao río Portapego en Touro. De novo o cauce deste río apareceu de cor branca e con numerosas bolas de escuma branca procedente dos terreos mineiros que van augas abaixo.
A organización ecoloxista denuncia que, a pesar de que estes episodios son continuos, o concello de Touro non ten realizado ningunha acción ao respecto, non ten aberto ningún tipo de expediente e segue sen esixir responsabilidades a propietaria da mina.
Lembran que o río Portapego é un dos ríos do concello de Touro que se viu afectado por contaminación de drenaxe áceda de mina que tivo lugar neste concello entre os anos 70 e 80 do século pasado. A empresa que adquiriu os terreos mineiros no ano 1993, Explotaciones Gallegas, mercounos para a extracción de áridos e tamén co compromiso da restauración medioambiental dos terreos e das aguas.
Sinalan que este ano cúmprense 30 anos, ao longo destes anos fixéronse moitas campañas publicitarias financiadas tanto con fondos públicos como privados co propósito de reabrir a mina. A través de publireportaxes queren convencer á veciñanza dunha restauración das augas inexistente, chegando a anunciar na televisión pública e varios medios de comunicación escritos o remate das obras de limpeza do río Portapego por enésima vez.
Tamén destacan que Augas de Galicia acumula expedientes de denuncias por vetidos as augas, que uns días van brancas e outros días de cor cobre, e debátese na resolución dun expediente aberto dende 2018. Un expediente que debería resolver a obriga á empresa Explotaciones Gallegas á eliminación da saída de augas de drenaxe ácida de mina ao dominio público hidraúlico. Ademais este organismo galego recolle no Plan Hidrolóxico Galicia Costa a afectación da minaría ás augas dos ríos Brandelos e Lañas, afluentes do Ulla.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.