Convocados os premios de novela Blanco Amor e o galardón de xestión cultural Rodolfo Prada

A Deputación de Ourense aprobou este luns as bases que rexerán os premios de novela Eduardo Branco Amor e o galardón Rodolfo Prada á xestión cultural. O XLII Premio Eduardo Blanco-Amor de novela ten como obxectivo difundir a literatura en Galicia e manter viva a figura do autor de 'A esmorga'.

O premio, cuxo prazo de presentación de orixinais finalizará o 24 de xullo, ten unha contía económica de 15.000 euros e a el poderán presentarse persoas con novelas inéditas escritas en lingua galega e na normativa vixente.

Así, este premio inclúe a publicación da novela por parte da editorial que libremente escolla a persoa gañadora. O xurado, estará composto por cinco membros de recoñecido prestixio no ámbito da cultura galega e a entrega do premio celebrarase o día 1 de decembro, coincidindo co 44 aniversario do falecemento do autor.

Pola súa banda, no V Premio Rodolfo Prada á xestión cultural poderán participar persoas profesionais, afeccionadas ou colectivos que, dentro deste ámbito cultural, desenvolvan a súa actividade dentro ou fóra de Galicia, pero con claras referencias nos seus contidos e obxectivos á cultura galega.

Este galardón conta cun orzamento de 10.000 euros e consta de tres categorías: proxectos culturais promovidos por persoas físicas, tanto profesionais como voluntarias, ou colectivos, cun premio de 3.000, 2.000 ou 1.000 euros, respectivamente.

X PREMIO ESTATUTO DE AUTONOMÍA

Así mesmo, foron aprobadas as bases do X Premio Estatuto de Autonomía de Galicia de debuxo e redacción escolar. No certame poderán participar, sempre con traballos individuais, os estudantes de todos os niveis educativos divididos en dúas modalidades. En ambos os casos, o prazo de presentación dos traballos finalizará ás 14.00 horas de 22 de marzo e o xurado fará público o seu fallo o día 30 do citado mes.