Por Europa Press / Redacción | SANTIAGO DE COMPOSTELA | 22/02/2023 | Actualizada ás 16:49
O vicepresidente primeiro da Xunta, Francisco Conde, fixo súas algunhas das observacións realizadas pola delegación da Comisión de Control Orzamentario do Parlamento Europeo que esta semana visitou España e pediu ao Goberno central máis "flexibilidade" na aplicación dos fondos europeos que transfire e que "conte coas comunidades autónomas" no deseño e execución das estratexias.
Así o sinalou Conde este mércores durante unha resposta oral no Parlamento galego a unha pregunta do portavoz do PPdeG, Pedro Puy, quen destacou o "esforzo histórico" realizado pola Unión Europea tras a pandemia, tanto cos fondos de recuperación --en total, serán 140.000 millóns para España-- como co plan orzamentario entre os anos 2021 e 2027.
Na súa resposta, o vicepresidente primeiro da Xunta e conselleiro de Economía, Industria e Innovación tachou de "relato dun fracaso" os plans do Goberno central con estas contías. Por unha banda, foi un "fracaso de deseño", porque "non contou en ningún momento coas comunidades autónomas" no desenvolvemento dos chamados Perte --Proxectos Estratéxicos para a Recuperación e Transformación Económica--.
"E un fracaso de execución, porque a centralización de fondos demostra a súa incapacidade (a do Executivo estatal) para que os recursos cheguen ás familias e empresas", engadiu Conde.
Neste contexto, referiuse a esa comisión da Eurocámara que visitou esta semana España e cuxa presidenta, a alemá Monika Hohlmeier, sinalou este mércores que hai un atraso e que se debe mellorar a transparencia. Iso si, ben non ve indicios de "fraude ou infracción" nos fondos despregados nin hai "perspectiva de cortarlle agora a billa a España".
Conde considera que a postura de Hohlmeier avala que o Executivo de Pedro Sánchez debe "pasar a unha cogobernanza efectiva" e "deixar de mirar ás comunidades autónomas para responsabilizalas dos erros que comete o propio Goberno". A maiores, reclamou unha maior "flexibilidade" para a súa aplicación, porque "os poucos fondos" que recibiu Galicia ata o momento, uns 1.200 millóns de euros, chegaron "totalmente condicionados".
O vicepresidente da Xunta tamén se dirixiu á bancada da oposición --BNG e PSdeG-- para tenderlles a man e "traballar conxuntamente" para que Galicia "poida acceder con igualdade de oportunidades" aos fondos de recuperación.
E é que, tal e como criticou, hai comunidades ás que o Goberno concece "axudas directas" vía Real Decreto, como Cataluña e Comunidade Valenciana; mentres que no Perte do Vehículo Eléctrico e Conectado, para a segunda convocatoria, está "a incumprir o compromiso de convocar un grupo de traballo" coas autonomías.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.