Por Europa Press / Redacción | SANTIAGO DE COMPOSTELA | 24/02/2023 | Actualizada ás 13:41
Un estudo sobre empresas galegas que analiza distintas variables dun total de 60 grupos observa "máis igualdade, excepto entre os directivos", polo que fala de "lixeiros avances" nesta materia.
Ademais, a terceira edición do 'Atlas galego da empresa comprometida' detecta "estancamento" no trato ao persoal --na categoría 'persoas' a situación "parece estancada"--, aínda que constata "progresión" no resto: bo goberno, relación co medio ambiente e coa contorna.
Este documento, que elabora 'Economía Digital', analiza as accións postas en marcha para alcanzar o obxectivo de igualdade e a presenza "real" de mulleres nos órganos de goberno. Respecto das accións, destaca que "unicamente no 45% das empresas a maioría do persoal pode elixir o teletraballo como opción varios días á semana". "Parece unha mala noticia tanto para a flexibilidade a favor do persoal, para a conciliación laboral e mesmo para o control de emisións de CO2", apunta.
En relación á presenza da muller nos órganos de dirección das empresas, "apenas houbo diferencia respecto da pasada edición", recolle, pois no comité de dirección pasou dun 29,1% ao 30% e no consello de administración do 22,9 ao 23,7% (sempre segundo cálculos de media aritmética).
O atlas subliña que, das compañías examinadas, en Kaleido Logistics, Inveravante, Leche Río, Torre de Núñez, Externa Trabajo Temporal e Espomasa Poliuretanos, "as mulleres son maioría en elcomité de dirección", mentres que en Torre de Núñez, Espomasa e Emalcsa son maioría no consello de administración.
"AVANCE NOTORIO"
Un "avance notorio" atribúelle á variable de 'ética', dentro da categoría de bo goberno, con "melloras evidentes en todos os atributos". Na que mide a protección do medio ambiente, "a progresión non admite dúbida" e en cada variable que analiza o estudo obsérvase un aumento na preocupación da empresa galega respecto ao cambio climático.
Na categoría que avalía a relación das empresas galegas coa súa contorna próxima, aprecia "igualmente" unha "mellor posición xeral salvo nunha variable" que se "antolla crítica": a penetración dos provedores galegos sobre o aprovisionamento total, "unha variable estratéxica ante a revisión do proceso globalizador que se vive no mundo e que (...) non mostrou mellora algunha".
Finalmente, na categoría 'persoas', a situación mantense "en niveis similares" aos da edición pasada, salvo a variable de igualdade, na que se rexistran os xa mencionados "lixeiros avances".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.