Comesaña saca peito de que o Sergas é "pioneiro" en Oncoloxía
Sanidade reivindica o seu plan de xestión do cancro, que inclúe un novo programa de seguimento para pacientes que finalizan un tratamento
Por Europa Press / Redacción | SANTIAGO DE COMPOSTELA | 27/02/2023 | Actualizada ás 18:11
O edificio da Consellería de Sanidade en San Lázaro, en Santiago de Compostela, acolleu na tarde deste luns a xornada 'Plans de Cancro. De Europa a Galicia', na que se deron cita xestores e profesionais para abordar as novidades tanto a nivel galego como comunitario en prevención, diagnóstico e tratamento de enfermidades oncolóxicas.
O conselleiro do ramo, Julio García Comesaña, reivindicou ao Servizo Galego de Saúde (Sergas) como "pioneiro" neste campo durante a inauguración deste evento, na que tamén asistiron a xerente do Sergas, Estrela López-Pardo, e a directora de Market Access da farmacéutica Bristol-Myers Squibb (MBS) para España e Portugal, Mónica Ausejo.
Durante a súa intervención, García Comesaña reivindicou a estratexia de xestión do cancro en Galicia, presentada en outubro de 2023, que recolle un novo programa asistencial de seguimento para persoas que finalizan un tratamento oncolóxico.
Tamén fai fincapé este plan, aliñado co que está vixente a nivel europeo, na optimización do coñecemento dos equipos sanitarios e na innovación. De igual modo, contempla a posibilidade de tecer "unha rede colaborativa" con Atención Primaria e outras especialidades para a formación en determinadas patoloxías oncolóxicas, "especialmente no caso daquelas que requiran dun diagnóstico precoz".
Así mesmo, o conselleiro de Sanidade sacou peito dos cribados que practica o Sergas de forma "pioneira" e que se ampliarán en próximos meses. De tal forma, os orzamentos da Xunta destinados a estes efectos en 2023 foron 2,6 millóns de euros, un 70 por cento máis con respecto ao ano pasado.
A estratexia galega tamén propón intervir e controlar os factores de risco "fomentando estilos de vida saudables e incidindo na necesidade da prevención e no aumento dos diagnósticos temperáns", que son "fundamentais para atallar con éxito o cancro". "O que queremos é proporcionar unha maior tranquilidade ao paciente ao longo do seu tratamento e garantirlle a mellor calidade de vida posible", resumiu.
"IMPORTANTE LIDERADO" DE GALICIA
A responsable de MBS coincidiu en sinalar o "importante liderado" que ten Galicia na implementación da estratexia europea, con medidas que implican "innovación" tanto a nivel clínico como organizativo e de xestión.
Precisamente, Mónica Ausejo explicou que o cancro é "unha das máximas prioridades" para a UE no ámbito da saúde, tendo en conta que é unha das patoloxías do continente que ten un maior impacto na poboación e na economía.
Por isto mesmo, a UE priorizou na súa axenda sanitaria esta estratexia contra o cancro, aínda que tivo que ser parada coa pandemia "e agora retomouse cun maior impulso", destacou a responsable de Market Access de MBS para España e Portugal.
Neste contexto, Ausejo avalou que se deixe en mans dos sistemas autonómicos o desenvolvemento máis concreto das medidas fronte a outros estados membros que articulan estratexias nacionais: "Quizá planificar a nivel nacional deixa fóra aspectos locais, que son a esencia para ter plans efectivos. Hai que buscar solucións locais".
Ademais, reivindicou a implicación de Bristol-Myers Squibb no campo da Oncoloxía e puxo o foco en que España, despois de Estados Unidos, é o país no que máis ensaios clínicos están implicados. De feito, o 16 por cento dos que desenvolven a nivel estatal están situados en Galicia.
MENOS MORTOS E MELLOR VIDA
Nesta xornada celebrada no edificio da Consellería, o primeiro relatorio impartiuna o doutor Rafael López, xefe do Servizo de Oncoloxía Médica do Complexo Hospitalario Universitaria de Santiago de Compostela (CHUS). Versou sobre os plans integrais contra o cancro en Europa. A intención de todas estas estratexias na UE, segundo subliñou, é "tentar que morran menos europeos e que os europeos que teñan cancro vivan mellor".
